Naýqas aýrýhanaǵa 9 qazan kúni óte aýyr halde túsken-tuǵyn. Jedel tekserýden ótý barysynda onyń sol jaq mıynyń ortańǵy arterııasynda tromboz belgileriniń bary anyqtaldy. Dárigerler kóp oılanbastan oǵan ınsýlt dıagnozyn qoıady. Naqtyraq aıtqanda, ıshemııalyq ınsýlt – qan tamyrlarynyń trombtarmen bitelýi. Buǵan qosa naýqastyń oń jaq aıaǵy men qoly tolyǵymen saldanyp, sóıleý jáne estý qabiletinen aıyrylady.
Dertke shaldyqqan azamattyń aýrýhanaǵa jetken sátte ınsýlt alǵanyna úsh saǵattan astam ýaqyt bolypty. Dárigerler sol arada oǵan shuǵyl túrde operasııa jasaýǵa sheshim qabyldap, ol angıografııa apparaty arqyly, ıaǵnı pyshaq tiliginsiz ótedi.
Qaýipsiz ota aýrýhananyń bas dárigeri ári qalanyń shtattan tys bas rentgenhırýrgi, joǵarǵy sanatty dáriger A.Rahmatalıev pen aýrýhananyń rentgenhırýrgi N.Qarabaevtyń qolymen maıdan qyl sýyrǵandaı asa názik ári joǵary dáldikpen júrgizildi. Bas-aıaǵy eki saǵatqa sozylǵan operasııa sátti aıaqtalyp, dárigerlerdiń kómegimen naýqas jany ajaldan aman qaldy.
«Angıografııalyq apparat arqyly tromboektomııa jasadyq. Bul negizinen kúrdeli operasııa sanalady. Biraq zamanaýı medısınalyq qurylǵynyń kómegimen búginde mundaı otany jasaýdyń qıyndyǵy azaıyp, aýrýdyń tez aıaqqa turyp ketý múmkindigi artty. Qazirgi tańda naýqas ózin óte jaqsy sezinedi. О́zi turyp-júrip, suraqtarǵa tolyq jaýap bere alady. Osy rette aıta ketken jón, №2 qalalyq aýrýhananyń ınsýlt ortalyǵy 3-deńgeıde jumys isteıdi. Eger adam ınsýlt alyp qalyp, derti meńdemeı turyp 4-6 saǵat aralyǵynda shuǵyl aýrýhanaǵa kelip túsetin bolsa, joǵary sapaly mamandandyrylǵan tehnologııalyq medısınalyq kómek berip úlgeremiz. Mundaıda kóptegen adamdy aman alyp qalýǵa múmkindigimiz joǵary bolady», – deıdi ortalyq meńgerýshisi R.Isabekuly.
Al 52 jastaǵy naýqas operasııadan soń bir saǵat ishinde tolyq esin jınap, oń jaq aıaq-qolynyń qyzmeti qalpyna kelip, burynǵy qalpyna tolyǵymen oraldy. Sóıleý, estý qabileti de qaıta qalpyna keldi. Otadan soń bir kún boıy qarqyndy terapııa bloginde baqylaýda bolyp, kelesi kúni palataǵa aýystyryldy. Qazirgi tańda dárigerler jaǵdaıyn jaqsy dep baǵalap otyr.
О́z kezeginde aq jeleńdi abzal jandardyń kómegimen dúnıe esigin qaıta ashqan naýqas osy qaltqysyz qyzmetteri úshin dárigerlerge sheksiz alǵysyn jaýdyrdy.
Jalpy, angıografııalyq apparat Shymkentte №2 qalalyq aýrýhanada, qalalyq klınıkalyq balalar aýrýhanasynda jáne onkologııalyq ortalyq pen №1 qalalyq klınıkalyq aýrýhanasynda bar.
