Sonyń ishinde Shymkent qalasynyń ár aýdanynan 4 otbasydan iriktep alynyp, qalalyq kezeńge 16 otbasy qatysqan. Arnaıy komıssııanyń sheshimimen bokstan halyqaralyq dárejedegi sport sheberi, álem chempıony Birjan Jaqypovtaı aptal azamatty tárbıelep ósirgen Quttybekovter otbasy jeńimpaz dep tanylyp, baıqaýdyń respýblıkalyq kezeńine joldama aldy.
– Halqymyzda «Otan – otbasynan bastalady» degen uǵym bar. Sebebi otbasy qaı zamanda da el bolashaǵy – jastardy tárbıeleıtin shańyraq bolǵan. Sondyqtan otbasy ınstıtýtynyń irgesin nyǵaıtý – Qazaqstannyń keleshegin kemeldi etýdiń birden bir kepili. «Mereıli otbasy» ulttyq baıqaýynyń maqsaty da sol, úlgili otbasylardy anyqtap, olardyń ónegesin ózgelerge kórsetý jáne de ulttyq salt-dástúrimiz ben otbasy qundylyqtaryn nasıhattap, otansúıgish, izgi urpaq tárbıeleý, – dedi Ulttyq baıqaýdyń
qalalyq kezeńiniń marapattaý rásiminde sóz sóılegen Shymkent qalalyq ishki saıasat jáne jastar isteri jónindegi basqarmasynyń basshysy Muratjan Shotanov.
Basqarma basshysynyń aıtýynsha, halqymyz ejelden ulttyq jáne otbasylyq dástúrlerge berik. Bul qoǵamdaǵy rýhanı qundylyqtardyń saqtalýyna oń yqpal etedi. Sondyqtan atalǵan is-sharany Qazaqstannyń áleýmettik saıasatynyń mańyzdy bóligi deýge tolyq negiz bar.
Sonymen birge «Mereıli otbasy» ulttyq baıqaýy – bir shańyraq astynda berekeli ómir súrýdiń qanshalyqty mańyzdy ekenin túsinýge, otbasylyq ómir salty, ata-analyq paryz, jaýapkershilik sekildi uǵymdardy el sanasyna sińirýge, ásirese jastarǵa jetkizýge múmkindik beredi.
Endeshe jeńimpaz otbasynyń ózi týraly qysqasha maǵlumat bere ketsek, Bokstan Álem chempıony, halyqaralyq sport sheberi «Qurmet» ordeniniń ıegeri, úsh olımpıada oıyndarynyń qatysýshysy, álem birinshiliginiń qola júldegeri, Azııa chempıonatynyń eki márte kúmis júldegeri, Qazaqstannyń birneshe dúrkin chempıony Birjan Jaqypovtyń ákesi 69 jastaǵy Jaqyp Quttybekov búginde jekemenshik sport mektebiniń dırektory qyzmetin atqarady. Al anasy Qarlyǵash Záýirbekova sanaly ǵumyryn jas urpaqqa bilim berýge arnaǵan ulaǵatty ustaz. Qyryq jyldan astam ýaqyt boıy shákirtterge matematıka páninen sabaq bergen Qarlyǵash apaı búginde qurmetti eńbek demalysynda. Ekeýiniń otasqanyna bıyl – 45 jyl. Baqytty ata-ana tórt perzent tárbıelep, olardan 15 nemere súıip otyr.
Marapattaý rásiminde jeńimpazdar men qatysýshylarǵa qala ákiminiń Alǵys haty men baǵaly syılyqtar tapsyryldy. Al is-shara sońy merekelik konsertke ulasty.
ShYMKENT
