55 kúnde 5 myń 555 shaqyrym joldy eńserýdi josparlaǵan qazaqstandyq velomarafonshy birer kún buryn Túrkııanyń astanasyna at basyn tiredi. Osy ýaqyt aralyǵynda ol Qazaqstannyń tórt oblysynda, ıaǵnı Qostanaı, Aqtóbe, Atyraý jáne Mańǵystaýda bolyp, odan ári Qap taýyn betke aldy. Grýzııanyń taýly-qyratty aýmaqtaryn júrip ótken jerlesimiz endi, mine, mejeli jerine de kelip jetti. Bir aıta keterligi, ol ár toqtaǵan jerinde ult ustazynyń eńbegin nasıhattap ta úlgergen.
Ankaraǵa jetken veloshabandozdy Túrkııanyń Kechıóren aýdanyndaǵy jurtshylyq ystyq yqylaspen kútip aldy. Qarsy alýshylardyń qatarynda aýdan meri men Qazaqstan elshisi de bar.
Velosherýshi jınalǵan jurtshylyqty eki eldiń dıplomatııalyq qarym-qatynasynyń 30 jyldyǵymen quttyqtap, ult ustazy týraly keleli áńgime órbitti. Kelýshilerge alǵysyn bildirip, jolda bolǵan shytyrman oqıǵalaryn ortaǵa saldy. «Batyr babalardyń, bahadúrlerdiń búgingi urpaǵy retinde qos dóńgelekti temir atty tizgindep, Anadoly jerine keldim. Qazaq eli, qazaq jurty, Qazaqstan – barsha túrkilerdiń atajurty. Sizderge atajurttyń ystyq sálemin ala jettim», dedi Ernat Melsuly.
Ahmet Baıtursynulynyń 150 jyldyǵyna arnalǵan velosherýdi keıipkerimiz Ystanbuldaǵy ataqty taekvondoshy Mustafa О́ztúriktiń zıratyna táý etýmen túıindemek. Oǵan deıin Ernat Túrik áleminiń mádenı astanasy Býrsaǵa baryp, qazaqtyń kók baıraǵyn jelbiretpek.
