Úsh úmitker tirkeýden ótpedi

Ortalyq saılaý komıs­sııa­synyń múshesi Sábıla Mustafına Baqyt Jańabaevtyń «Qazaqstan Respýblıkasyndaǵy saılaý týraly» Konstıtýsııalyq zań talaptaryna sáıkes prezıdenttikke kandıdatty tirkeý úshin kandıdattyń jáne onyń jubaıynyń aktıvteri men mindettemeleri týraly deklarasııa tapsyrǵany týraly anyqtamany jáne densaýlyq jaı-kúıi týraly medısınalyq qorytyndy usynǵanyn habar­lady. Aýmaqtyq saılaý komıs­sııalarynyń hattamalaryna sáıkes kandıdatty qoldaý úshin 58 889 qol jınalǵan. Tek­serý nátıjeleri bo­ıynsha 4 054 qol ras dep tanyldy. Bul saı­laý­shylardyń jalpy sanynyń keminde bir paıyzyna teń. Osy­laısha, saılaý týraly Konstıtý­sııalyq zańnyń 56-baby 2-tar­maǵynyń kandıdatty qoldaýǵa saılaýshylardyń qajetti qol­dar sany týraly talaby oryn­dalmaǵan. Ortalyq saılaý ko­mıs­sııasynyń qaýlysymen Baqyt Jańabaevty Prezıdenttikke kandıdat retinde tirkeýden bas tartyldy. 

Ortalyq saılaý komıs­sııa­synyń múshesi Shavqat О́temi­sov Nurjan Áltaevty 2022 jylǵy 6 qazanda «Muqal­mas» respýblıkalyq qoǵamdyq birl­es­tigi kandıdat retinde usynǵanyn habarlady. 11 qazandaǵy Astana qalasy Baıqońyr aýdany soty­nyń uıǵarymymen N.Áltaevty prezıdenttikke kandıdat etip usyný týraly «Muqalmas» bir­lestigi hattamasynyń qoldanylýy toqtatylǵanyna baılanysty Ortalyq saılaý komıssııasy 12 qazanda Konstıtýsııa men «Qazaq­stan Respýblıkasyndaǵy saılaý týraly» Konstıtýsııalyq zań talaptaryna sáıkestigin belgileý rásimin toqtatqan. 17 qazanda sot óz sheshimimen joǵaryda atalǵan hattamany jaramsyz dep tanydy. Osylaısha, qazirgi ýaqytta Ortalyq saılaý komıssııasynyń qaraýynda N.Áltaevty prezı­denttikke kandıdat etip usyný týraly qoldanystaǵy qujat joq. Osynyń negizinde Ortalyq saılaý komıssııasy N.Áltaevty usyný «Qazaqstan Respýblıkasyndaǵy saılaý týraly» Konstıtýsııalyq zańynyń 54-babynda belgilengen talaptarǵa sáıkes kelmeıtinin anyqtady jáne ony kandıdat retinde tirkeýden bas tartty.

Ortalyq saılaý komıs­sııasynyń múshesi Anastasııa Shegorsova Jumataı Álıevtiń «Qazaqstan Respýblıkasyndaǵy saılaý týraly» Konstıtýsııalyq zań talaptaryna sáıkes pre­zı­denttikke kandıdatty tirkeý úshin kandıdattyń aktıvteri men mindettemeleri týraly deklarasııa tapsyrǵany týraly anyqtamany jáne densaýlyq jaǵdaıy týraly medısınalyq qorytyndy usynǵanyn habarlady. Bul rette usynylǵan medısınalyq qory­tyndy Ortalyq saılaý komıs­sııasynyń birlesken norma­tıvtik qaýlysymen jáne Den­saýlyq saqtaý mınıstrliginiń buı­ryǵymen bekitilgen belgilengen nysanǵa sáıkes kelmeıtini anyqtaldy. Aýmaqtyq saılaý komıssııalarynyń hattamalaryna sáıkes kandıdatty qoldaý úshin 187 723 qol jınalǵan. Tekserý nátıjesinde 36 776 qol ras dep tanyldy. Bul saılaýshylardyń jalpy sanynyń keminde bir paıyzyna teń. Osylaısha saılaý týraly Konstıtýsııalyq zańnyń 56-baby 2-tarmaǵynyń kandıdatty qoldaýǵa saılaýshylardyń qajetti qoldar sany týraly talaby oryndalmady. Ortalyq saılaý komıssııasynyń qaýlysymen Jumataı Álıevti kandıdat retinde tirkeýden bas tartyldy.