Elordadaǵy Start bılıard klýbynda jalaýy jelbiregen tastaıaq jarysyna qalamgerler qaýymy synǵa tústi. Sondaı-aq týrnır jeńimpazynan bólek, qatysýshylar úsh atalym boıynsha, ıaǵnı ult ustazy Ahmet Baıtursynuly, Halyq jazýshysy, qoǵam qaıratkeri Sherhan Murtaza jáne belgili jýrnalıst, etnograf-ǵalym Aqseleý Seıdimbek atyndaǵy arnaıy sertıfıkattarmen marapattaldy.
Al dodaǵa bılıardtyń erkin pıramıda túrinen eki dúrkin álem chempıony (2010, 2021), halyqaralyq dárejedegi sport sheberi qazaqstandyq Ernar Shymbaev tórelik etti.
Jarystyń ashylý saltanatynda «Elorda Aqparat» medıaholdıngine qarasty «Astana aqshamy» gazetiniń bas redaktory Erkin Qydyr sóz sóılep, kóp jyl boıy tasada qalǵan týrnır budan bylaı qaıtadan jandanatynyn aıtty.
«25 qazan – qaıtadan elimizdiń eń basty merekesine aınalyp jatyr. Sonyń qurmetine oraı birazdan beri úzilip qalǵan qalamgerler arasyndaǵy dástúrli týrnırdi qaıtadan jańǵyrtyp jatyrmyz. Bul ıgi dástúr budan keıin de jalǵasyn tabady degen senimdemin. Qalamgerlerdiń tastaıaq týrnırin saǵynyp qalǵany kórinip tur. Mine, ózderińiz baıqaǵandaı, «Elorda Aqparat» uıymdastyryp jatqan týrnırge bas qaladaǵy bedeldi qalamgerler, úlken jazýshy aǵalarymyz, jas jýrnalıster qatysyp, jarystyń mártebesin kóterip jatyr», dedi Erkin Qydyr.
«Elorda Aqparat» medıaholdınginiń dırektory Oljas Sydyqbek jazýshy, qoǵam qaıratkeri Tólen Ábdikke qurmet kórsetip, qazaqy dástúr boıynsha jýyrda ǵana mereıli 80 jasqa tolǵan aqsaqalǵa shapan japty. Sondaı-aq jarys qorytyndysy boıynsha T.Ábdik ult ustazy Ahmet Baıtursynuly atyndaǵy arnaıy júldemen marapattaldy.
Al jazýshy Ýálıhan Qalıjan Sherhan Murtaza atyndaǵy arnaıy júldege ıe bolsa, jazýshy, ǵalym, tarıhshy Qoıshyǵara Salǵaraulyna Aqseleý Seıdimbek atyndaǵy arnaıy júlde tabystaldy. Sonymen qatar senator Nurtóre Júsipke «Mergen» arnaıy júldesi buıyrsa, aqyn Nesipbek Aıtuly «eń mádenıetti oıynshy» júldesin qanjyǵalady.
Jarystyń qorytyndysy boıynsha, tanymal jýrnalıst Nurdilda Oraz top jaryp, qarjylaı 200 myń teńge syıaqyǵa ıe boldy. Ekinshi oryndy jýrnalıst Ahmet Qaıratuly ıemdense (150 myń teńge), úzdik úshtikti Parlament Májilisiniń depýtaty, jýrnalıst Janarbek Áshimjan men jýrnalıst Erbol Erdenbek (100 myń teńge) túıindedi.
