Keshe ǵana qyzyl jalynǵa oranǵan qylqan japyraǵy kúlge aınalyp kókke ushqan qaraǵaıly ormannyń sýyǵan kóz jasyndaı sap-salqyn jańbyr jaýyp turǵanda shatyrdyń astynda shattyq kiltin úlestirgen oblys ákimi sózin saltanatty sharaǵa jınalǵan kópshilikti ulttyq mereke – Respýblıka kúnimen quttyqtaýdan bastady.
– Búgin osy uly meıramnyń qarsańynda júzge jýyq otbasy jańa baspananyń kiltin alyp, qonys toıyn toılaǵaly otyr. Osydan az ǵana ýaqyt buryn bolǵan alapat órt úlken zardabyn tıgizgenin bilesizder. Qıyn sátte Áýlıekólge el Prezıdenti Qasym-Jomart Kemeluly Toqaevtyń ózi kelip, jaǵdaıdy tikeleı baqylaýyna aldy. Memleket basshysynyń tapsyrmasymen órt zardaptaryn joıýǵa baǵyttalǵan naqty sharalar qabyldandy. Qalyń el birigip, órtten zardap shekkenderge qoldaý kórsetti. Elimizdiń túkpir-túkpirinen aǵylyp kelip jatqan gýmanıtarlyq kómekte shek bolǵan joq. Biz Qazaqstan halqynyń birligin, otandastarymyzdyń janashyrlyǵyn aıqyn sezindik. Úkimettiń qoldaýymen jedel túrde turǵyn úı qurylysyna kiristik. Bul iske elimizdiń jáne oblysymyzdyń mańdaıaldy qurylys kompanııalary bar kúsh-jigerin saldy. Sonyń arqasynda aınalasy az ýaqyt ishinde jańa baspanalaryńyz daıyn boldy. «Jumyla kótergen júk jeńil» degen halyq danalyǵy osyndaıda aıtylsa kerek, – dedi Arhımed Muhambetov.
Áýlıekóldiń irgesindegi qurylys 6 qyrkúıekte bastalǵan. Aınalasy bir jarym aıdyń ishinde tolyq aıaqtalyp bitti. 45 kúnniń ishinde taqyr jerde 91 úıli úlken bir aýyl paıda boldy. Qısynǵa shaǵyp kórsek, kúnine eki úıden salynyp otyrypty. Bir-birinen aýmaıtyn kók shatyrly, qyzyl kirpishti, aýdany 100 sharshy metrlik, tórt bólmeli kelisti úıler. Ár úıdiń janynda mal ustap, qosalqy sharýashylyq júrgizýge qolaıly 10 sotyq jeri bar. Aýlasy jasyl sharbaqpen qorshalǵan. Jańa úılerdiń bári tabıǵı gazben jylytylady, ishine sý kirip tur. Dárethanasy men vannasy bar. 91 úıdiń bárine ınternet qosýly tur. Turǵyndar ony osy jyldyń sońyna deıin tegin paıdalanady. Shaǵyn aýdannyń aýmaǵy abattandyrylyp, taqtaıdaı túzý kósheler tóselipti.
Oblystyq qurylys, sáýlet jáne qala qurylysy basqarmasy basshysynyń orynbasary Dınara Yqylasovanyń aıtýynsha, «Birlik» shaǵyn aýdanyndaǵy turǵyn úılerdi «BK-Stroı», «SK KBS», «Stroı Elıt Dom», «Rýdnyı sokolovstroı», «Alıýmınstroı», «EkspoTrans», «Statýs Treıd», «Syl», «Elena D», «Nýrkapstroıgaz», «Arvıs», «Trans Compani» sııaqty 12 qurylys kompanııasy turǵyzǵan.
«EPK-Forfait» kompanııasy elektr jelisin júrgizip, «Bakbıldıng» seriktestigi sý qubyryn, «Alııa-Servıs» JShS gaz qubyryn tartyp berdi. «Van» kompanııasy qalashyqqa kóshe salyp, asfalt tósedi.
– Qazir órtenip ketken turǵyn úıler men ǵımarattar súrilip, onyń ornyna balalarǵa arnalǵan 4 alańqaı, 1 fýtbol jáne 2 sport alańyn salý jumystary bastaldy. 10 qazannan beri 64,1 gektar alqapty alyp jatqan Basaman jáne Semıozernyı orman sharýashylyqtary aýmaǵynda orman órtiniń saldaryn joıý, tazartý jáne aǵash daıyndaý jumystary júrip jatyr, – dedi Dınara Yqylasova.
Kesilgen aǵash zańmen bekitilgen erejege sáıkes suryptalyp, saýdaǵa shyǵarylady. Túsken qarjy ormandy qalpyna keltirýge jumsalady. Otalatyn ormannyń aýmaǵyn anyqtap belgileýge 100-ge tarta adam jumyldyrylǵan. Al aǵashty qulatý, butaǵyn tazalaý, tasymaldaý tárizdi sharýany 63 adamnan turatyn 7 brıgada atqaryp jatyr. Sonymen qatar bul jumystardy atqarýǵa 14 traktor satyp alynǵan.
Taýar tasymalymen aınalysatyn iri kompanııalardyń biri jańadan salynǵan 91 úıdiń bárine bir-bir tońazytqysh kirgizip qoıypty.
– Bul qaıyrymdyq shara eshbir ımıdjdik sıpatta nemese PR maqsatta uıymdastyrylyp otyrǵan joq. Bizdiń basty mıssııamyz – kompanııanyń áleýmettik jaýapkershiligindegi mindetterdi iske asyrý. Árbir muqtaj otbasyna barynsha ashyq túrde kómek berý, – deıdi kompanııa ókilderi.
Jańa qonysqa ornalasqandardyń ishinde buǵan deıin bala-shaǵasymen birge kórshisiniń úıin panalap kelgen Rahmetovter otbasy da bar. Alapat órt kezinde bul otbasynyń Amanqaraǵaıdaǵy qos úıi jyldar boıy tirnektep jıǵan dúnıe-múlkimen qosa janyp ketken. Tipti, órtenip jatqan aýyldyń ishinde otaǵasy da qalyp qoıa jazdapty. Qaıta der kezinde aman-esen tabylǵany abyroı bolǵan.
– Sol kúni men Rýdnyıda turatyn týysymyz qaıtyp, tańerteń sol jaqqa ketip em, qaıtyp kelgenshe bári janyp bitipti. Joldasym kórinbeıdi. Jan ushyryp izdeı bastadyq. Qoıymen birge tútinniń arasynda júrgen jerinen ulym taýyp aldy. Joldasymdy ákim alyp shyqty, balam qoıdy aıdap shyqty. Bir balamyz qalada. О́zim úı sharýasyndaǵy adammyn. Qolymyzda 14 bas qoıymyz bar. Malǵa yńǵaıly bolsyn dep, osy jańa mekenniń shetindegi №7-shi úıdi qalap, surap aldyq. О́rtke deıin 100 bas taýyq ustaǵam. Onyń bári janyp ketti. Balalarym, nemerelerim bar. Buryn as bólmesin eseptemegende, úsh bólmeli tas úıde turdyq. Irgesi myqty, tóbesi osy ózimiz kireıik dep otyrǵan úıdiki sııaqty bıik bolatyn. Osydan bir jyl buryn gaz tartyp, sý kirgizip alǵanbyz. Ol úıim búkil dúnıe-múlkimen birge órtenip ketti. Qysta kórpe quraýshy em, quraǵym da, kórpem de ketti. Balalardyń kıim-keshegine deıin janyp ketti. Endi kózimiz kórgen, estigen jerden baryp kómek alyp jatyrmyz. Azyq-túlikti de berip jatyr. Dalada qalamyz ba dep qorqyp edik, úı berip jatyr, mine. Halqymyz túsi ıgiden túńilme deıdi ǵoı, bizdi memleket qamqorlyǵyna alyp, osy úı salynyp bitkenshe tikeleı qadaǵalap, qar túsip, kún sýytpaı jaǵdaıymyzdy jasap bergen Prezıdentimiz Qasym-Jomart Toqaevqa erekshe rızashylyǵymdy bildirgim keledi. Endi eshkim jamanshylyq kórmesin, irgemiz bútin bolsyn. Osy sońǵy eki aıǵa jýyq ýaqyttyń ishinde aýyzbirshiliktiń ne ekenin kózimizben kórip, janashyrlyqtyń qadir-qasıetin jan-júregimizben sezindik. Alla osy qasıetimizden aıyrmasyn, – deıdi aǵynan jarylǵan Jumakúl ana.
Amanqaraǵaıdyń ormany tek jerdiń kórki ǵana emes, bir qaýym jurtty asyrap otyrǵan nápaqa kózi de edi. Vıtalıı Dychko buǵan deıin osy ormannan sańyraýqulaq terip, monshaǵa qaıyń japyraqty sypyrtqy býyp, ony jol boıyndaǵy bazarda satýdy kásip etip kelgen. 3 qyrkúıekte astyndaǵy avtokóligi, sol kúni ústine kıip júrgen sport kostıými men qujattarynan basqanyń bári úıimen qosa janyp ketti.
– Biz aınalany tútin basyp ketken soń, balalardyń amandyǵyn oılap, bárin tastap basqa aýyldaǵy týysymyzdyń úıine ketip qaldyq. Tórt balamyz bar. О́rt basylǵan soń kelsek, úıimizdiń saý-tamtyǵy qalmapty. Qora-qopsymyz da órtenip ketken. Qazir qaryndasymnyń úıin panalap otyrmyz. Ol úıde tórteý edi, onyń ústine altaýmyz baryp qosyldyq. Aqshalaı, azyq-túlik, kıim-keshek túrinde kómek alyp turamyz. Jergilikti ákimdik mamandary jaǵdaıymyzdy únemi surap-bilip, keregimizdi taýyp berip turady. Memleket eki balamdy lagerge jiberdi. Sol jaqta ári demalady, ári sabaqtaryn oqıdy. Mektep jasyna deıingi eki kishkentaıym tegin balabaqshaǵa baryp júr. Qyrkúıektiń basynda bar dúnıe-múlkimizden aıyrylǵanda qatty abdyrap qaldyq. Tipti ómirden túńilip kettik desek bolady. Balalardyń bolashaǵy qalaı bolady, endi qaı jerge baryp turaq tabam degen oılar túnimen kóz ildirmeıtin. Sonyń bári kórgen tústeı óte shyqty. Baspanasyz qalǵan ár otbasy ózderin qorǵaıtyn memleket degen uly kúsh baryn osy joly jan-tánimen sezindi. Prezıdenttiń ózi bastap ketken qurylys qar túsip, kún sýytpaı tez aıaqtalyp, árqaısymyzǵa úı berip jatyr.
Sapasy burynǵy eski úıimizden áldeqaıda jaqsy. О́rtenip ketken úıim eski ári ishki bólmeleriniń ornalasýy da qolaısyz boldy. Memleket salyp bergen jańa úı kirpishten órildi, jyly ári keń, gaz ben sý kirip tur, bólmeleri de keń. Qurylystyń qalaı júrip jatqanyn kúnara kelip kórip turdyq. Qurylysshylardyń kúnniń atysynan tún jarymǵa deıin bel jazbaı jumys istegenin kózimizben kórdik. Ol jigitterge degen alǵysymyz sheksiz, – dedi Vıtalıı.
Áýlıekóldik kásipker Akıf Baıramovtyń jol boıyndaǵy dámhanasy úıimen birge órtke oranǵan. Qazir úıiniń orny ǵana jatyr, al dámhananyń qalqıǵan qabyrǵasy ǵana qalypty. Kásipker «Kúshimiz birlikte» qory ózi sııaqty órtten zardap shekken 5 kásipkerge 36 mln teńge kómek kórsetkenin aıtyp, rızashylyq bildirdi.
– Sol kúni aıaq astynan aınalany alapat órt alyp ketti. Men qyp-qyzyl jalynǵa oranyp janyp jatqan úıime kirip, ishten sóndirmek bolyp, biraz áýrege tústim. Biraq shamam jetpedi. О́rt kúsheıip syrtqa shyǵar esikti tappaı qaldym. Ábden álim quryp bara jatqanda, áıteýir kórer kúnim bar eken, órt sóndirýshiler alyp shyqty. Olar bolmaǵanda, sol jerde birjola qulaıtyn edim. Ol kisilerge máńgilik qaryzdarmyn. Kásipkerlik palatasynyń ókilderine de raqmet, kóp kómektesti. Bizdiń oblys ákimine, aýdan, aýyl ákimderine erekshe alǵys bildirgim keledi. Jandary qalmaı jaǵdaıymyzdy surap, aqyl berip, kómek kórsetip, keregimizdi taýyp berip, qoldan kelgenshe aıanyp qalǵan joq. Úıimnen de, dámhanamnan da aıyryldym. Dámhanam 22 jyl jumys istep tur edi. Qabyrǵasy ǵana qaldy. Ishindeginiń bári órtenip ketti. Sarapshylar alǵash shyǵyndarymdy eseptep 9 mln teńge berdi. Sol qarjyny paıdalanyp dámhananyń syrtyn durystap jatyrmyn. Biraq ony tolyq qalpyna keltirýge bul azdyq etedi. Ǵımaratty qalpyna keltirý shyǵyny qaıta eseptelgen soń, «Kúshimiz birlikte» qory taǵy 14 mln teńge qosyp berdi. Qazir ózim jataqhanada, otbasym týǵan-týystarymyzdyń úıin panalap júr. Qurylys jumystary qysqa merzimde aıaqtaldy. Búgin, mine, kópten kútken qonys toıǵa da jettik, – dedi kásipker.
Saltanatty shara aıaqtalǵan soń, árkim óz úıine qaraı asyqty. Dál osyny kútip turǵandaı, sirkirep turǵan jańbyr suıylyp baryp, artynsha japalaqtap qar jaýa bastady. Biz mingen kólik jańa aýyldan shyǵyp, kúre jolǵa túskende, aınala aq mamyqqa oranyp alǵan edi.
Qostanaı oblysy
