Eldigimizdi tý etken erekshe kún – Respýblıka kúni qarsańynda «Mereıli otbasy» ulttyq baıqaýynyń jeńimpazdary «Qazaqstan» Ortalyq konsert zalynda saltanatty túrde marapattaldy.
Osynaý izgi is-sharanyń basynda sóz alǵan Prezıdent Ákimshiligi Basshysynyń orynbasary, Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy Aıda Balaeva baıqaý jeńimpazdaryna Memleket basshysy Qasym-Jomart Toqaevtyń quttyqtaýyn oqyp berdi.
«Jyl saıyn ótkiziletin baıqaý shańyraǵy shattyqqa bólenip, berekeli birlik pen tatýlyqqa uıyǵan ónegeli otbasylardy kúlli elge tanytty. Mundaı úlgili áýletter elimizde óte kóp. Halqymyz qaı zamanda da otbasy dástúrlerin berik ustanyp, qadirleı bilgen. Úlkenge qurmet, kishige izet kórsetý – bizdiń qanymyzǵa sińgen qasıet. Árbir azamattyń adamgershilik bolmysynyń qalyptasýyna otbasyndaǵy ahýal aıryqsha yqpal etedi. Áke-sheshesiniń, ata-ájeniń tárbıesin kórip, úlkenderden taǵlym alyp ósken bala eseıgende otanshyl, bilimpaz, eńbekqor azamatqa aınalady», delingen Prezıdenttiń quttyqtaýynda.
Astanadan – Saǵıtovtar, Almatydan – Kishkenebaevtar, Shymkentten – Jaqypovtar, Aqmola oblysynan – Bojenovalar, Aqtóbe oblysynan – Ospanovtar, Almaty oblysynan – Dáribaevtar, Atyraý oblysynan – Janabaevtar, Shyǵys Qazaqstan oblysynan – Bozjigitovter, Jambyl oblysynan – Erjanovtar, Batys Qazaqstan oblysynan – Halyquly, Qaraǵandy oblysynan – Álimbaevtar, Qyzylorda oblysynan – Baıjanovtar, Qostanaı oblysynan – Sháripovter, Mańǵystaý oblysynan – Sebepbaevtar, Pavlodar oblysynan – Muhtarovtar, Soltústik Qazaqstan oblysynan – Mýhınder, Túrkistan oblysynan – Kúlbaıymbetovater, Abaı oblysynan – Zámzebaevtar, Jetisý oblysynan – Andas, Ulytaý oblysynan Áıtenovter otbasy qurmetke bólendi.
Rýhanı qundylyqtarymyzdy dáripteıtin ıgi dástúrge aınalǵan bıylǵy baıqaýǵa 2 542 otbasy qatysýǵa nıet tanytty. Olardyń jartysynan astamy, dálirek aıtsaq, 63,4%-y – aýyl turǵyndary. Bul, bir jaǵynan, aırandaı uıyp otyrǵan aýyl-aımaqta áli kúnge deıin qazaqylyqtyń qaımaǵy buzyla qoımaǵanyn, aq-adal peıili, kól-kósir kóńili, tatý-tátti turmysy bar ekenin kórsetedi.
Buǵan qosa úıelmeli-súıelmeli balalary bar 1 166 úlgili otbasy qatysty. Sondaı-aq erli-zaıyptynyń ekeýi de 29 jasqa tolmaǵan 501 jas otbasy osy baıqaýda baq synady.
Túrli kásip pen eńbek áýletteriniń, sport jáne shyǵarmashylyq ókilderinen quralǵan 20 otbasy óńir jeńimpazdary atandy. «Mereıli otbasy» ulttyq baıqaýy – úlkenge qurmet, kishige izet rýhanı-adamgershilik qaǵıdasyna negiz-
delgen jáne ony urpaqtan-urpaqqa jetkizýdi kózdeıtin otbasy qundylyǵyn dáriptep keledi. Barlyq otbasynyń árbir múshesi aýyldastarynyń, qala turǵyndarynyń, áriptesteriniń, kórshi-qolańnyń qurmetine bólengen, Otanyna adal qyzmet etip júrgen eńbek adamy, aýyldyń, qalanyń qarapaıym eńbekkerleri.
Marapattaý rásimine memlekettik organdardyń ókilderi, Parlament Senaty men Májilisiniń depýtattary, Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri qatysty.
Laýreat otbasylar dıplomdarmen jáne estelik syılyqtarmen marapattaldy. Marapattaý rásimi qazaq estrada juldyzdarynyń qatysýymen ótken merekelik konsertpen jalǵasty.
Jalpy, elimizde otbasy qundylyqtarynyń rólin arttyryp, otbasy men nekeniń oń ımıdjin dáripteıtin aýqymdy da mańyzdy baıqaýǵa 2014 jyldan beri 20 myńnan asa otbasy qatysqan.
