«О́zderińiz biletindeı, koronavırýs anyqtalǵan sátten bastap, Ýhan qalasy tolyq jabyldy. Oǵan eshkim kire de, shyǵa da almady. Qıyn jaǵdaıda qalǵan 200-300 qazaqstandyq stýdentti qaladan qalaı alyp shyǵamyz dep kúni-túni tolǵandyq. Bizdiń tarap ushaqtardy da, aqshany da daıyndap qoıǵan, al stýdentter bir qonaqúıge jınalyp, bizdi kútip otyrǵan. Alaıda jergilikti bılik qaladan eshkimdi shyǵarmaı qoıdy. Sonda bul iske Qytaıdyń Qazaqstandaǵy Elshiligin jumyldyryp, Beıjińdegi bılikpen máseleni sheshtik. Biraq stýdentterdi evakýasııalaýǵa tym az ýaqyt berildi», dep eske aldy Aıbek Smadııarov.
Onyń aıtýynsha, qazaqstandyq stýdentterdi alyp shyǵý úshin nebári 3 saǵat berilgen.
«Bastapqyda koronavırýs týraly málimet jetkiliksiz bolǵandyqtan, Ýhanǵa attanǵan ekıpaj múshelerinde úreı boldy. Ushaq belgilengen jerge qonǵannan keıin ekıpaj dalaǵa shyqqysy kelmedi. Sol kezde Syrtqy ister mınıstrliginen qytaısha biletin adamdy izdedik. Bir adam shyǵyp, tizimdegi stýdentterdi túgendeýge, jergilikti bılik ókilderimen kelissóz júrgizýge, stýdentterdiń vızalaryn durystaýǵa kómektesti», dep qosty SIM ókili.
