Bıylǵy oqý jylynda Jambyl oblysy boıynsha 9349 oqýshy mektep bitirip, bul kúni barlyq bilim shańyraqtarynda sońǵy qońyraý soǵyldy. Tarydaı bolyp kirip, taýdaı bolyp shyqqan bul oqýshylar sońǵy qońyraý jıynynda altyn uıa – mektepterimen qımaı-qımaı qoshtasty. «Biz sapaly bilim, adal eńbegimizben eldiń damýyna óz úlesimizdi qosamyz. Men psıholog mamandyǵyn tańdap otyrmyn. Bul adamǵa senim, úmit beretin, janyna únemi qoldaý kórsetip otyratyn mamandyq. Keshe ǵana mektep tabaldyryǵyn attaǵan sııaqty edik, mine, endi úlken ómirge joldama alyp otyrmyz.
Sońǵy qońyraý meniń máńgi esimde qalady. Bizge bilim bergen ustazdarymyzǵa myń alǵys. Laıym, arman arqalaǵan qurby-qurdastarymnyń bárine sáttilik tileımin», deıdi júzi qýanyshtan bal-bul janǵan Taraz qalasyndaǵy №5 mektep túlegi Ińkár Sovetova.
Búgingi zaman – bilimdiniń zamany. Táýelsiz elimizde jas túlekterdiń ıntellektýaldyq jáne shyǵarmashylyq qabiletterin kórsetýge barlyq jaǵdaı jasalǵan. Endi alda úlken syn tur. Bıyl Jambyl oblysyndaǵy mektep bitirýshi túlekterdiń 72,4 paıyzy Ulttyq biryńǵaı testileýge qatysýǵa nıet bildirip otyr. Onyń 300-i «Altyn belgige», 118-i úzdik attestatqa úmitker. Jalpy, jambyldyq oqýshylardyń bıylǵy oqý jylyndaǵy jetistikteri maqtan etýge turarlyq. 2014 jylǵy respýblıkalyq pán olımpıadalary
men ǵylymı joba jarysynyń qorytyndysy boıynsha oblys oqýshylary komandalyq esepte I oryndy ıelendi. Bıylǵy jyly halyqaralyq, respýblıkalyq deńgeıdegi bilim saıystarynda oblys oqýshylary barlyǵy 143 medaldi ıemdendi. Onyń 37-si altyn, 41-i kúmis, 65-i qola medal.
Sońǵy qońyraý – jastarǵa úlken jaýapkershilik júkteıdi, boılaryna rýh, kúsh, senim beredi. Adamdy eseıtip, armanǵa bóleıtin erekshe kún. Bolashaqqa nyq qadam basyp, azamat atanǵan jastardyń saparlary sátti bolsyn deıik.
Oralhan DÁÝIT,
«Egemen Qazaqstan».
Jambyl oblysy.
