О́temaqy tóleýdiń sharttaryn, tártibi men merzimin ár bank óz betinshe anyqtaıdy. Sondyqtan bul aqparattardy bilý úshin salymshylar depozıt ashylǵan bankke tikeleı habarlasýy qajet. Tıisti aqparat ekinshi deńgeıli bankterdiń resmı saıttarynda da bar.
«Biz salymshylardy ótemaqy alý múmkindigin paıdalanýǵa shaqyramyz. Eger sizde 2022 jyldyń 23 aqpanyna deıin depozıt ashylǵan bolsa, sizdiń bul syılyqaqyny alýǵa quqyǵyńyz bar. О́temaqy salymynyń eń joǵary somasy 20 mln teńge bolǵanymen, statıstıka kórsetkendeı, ótemaqy tóleýge negizinen 1 mln teńgege deıingi depozıtter jatady», dedi Qazaqstannyń depozıtterge kepildik berý qorynyń tóraǵasy Ádil О́tembaev.
Tólemderdi bankter 2023 jyldyń 23 aqpanynan keıin erejelerde belgilengen merzimderde júrgizedi. Jınaq, merzimdi, merzimsiz, sondaı-aq bilim berý jınaqtaý salymdary jáne turǵyn úı qurylys jınaqtary júıesindegi jınaqtar men salymdar óteýge jatady.
Qazaqstannyń depozıtterge kepildik berý qorynyń aqparatyna sáıkes 2022 jyldyń 1 qyrkúıegindegi jaǵdaı boıynsha 5 mln-nan astam salymshynyń salymdary ótemaqyǵa jatady. Olardyń ishinde salymshylardyń 97 paıyzynda 5 mln teńgege deıin depozıt bolsa, sonyń basym bóliginde (86 paıyzy) 1 mln teńgege deıin salym bar eken.
