«Mańǵystaýdyń aýyl sharýashylyǵy salasyndaǵy áleýetin arttyryp, azyq-túlik naryǵyn damytý asa mańyzdy. Agroónerkásip salasy – el ekonomıkasyn damytý isindegi strategııalyq basymdyqtyń biri. Men halyqaralyq forýmdarda álemdik naryqqa azyq-túlik ónimderin kóptep shyǵara alamyz dep jıi aıtamyn. Buǵan bizde mol múmkindik bar. Biraq eń aldymen, óz elimizdi sapaly ári arzan azyq-túlikpen qamtamasyz etýimiz kerek», dedi Prezıdent.
Onyń aıtýynsha, Mańǵystaý óńiri úshin bul másele aıryqsha mańyzdy.
«Aımaq turǵyndary jyl saıyn 100 mıllıon dollardyń azyq-túligin syrttan alady. Mundaı táýeldilik onyń baǵasyna tikeleı áser etetini belgili. Jyl basynan beri azyq-túlik baǵasy 20 paıyzdan astam qymbattaǵan. Kóbine mundaı ahýaldyń qalyptasýyna aımaqtyń ornalasqan jeri jáne logıstıka máseleleri sebep bolyp otyr», dedi Memleket basshysy.
