«Men óńirlerge saparymda jalpyulttyq mańyzy bar máselelerge arnaıy toqtalyp júrmin. Osy jerde de keıbir oı-pikirimdi aıtqym keledi. Biz myqty memleket quryp jatyrmyz. Biraq ádildik bolmasa, myqty memlekettiń ózi avtokratııaǵa aınalady», dedi Prezıdent.
Bul rette Qasym-Jomart Toqaev óziniń saıası baǵdarynyń eń basty ózegin atady.
«Eldiń damýy úshin ádildik túbegeıli ornyǵýǵa tıis. Onsyz halyqtyń memleketke degen senimi de bolmaıdy. Sondyqtan ádildik ıdeıasy – meniń saıası baǵdarymnyń eń basty ózegi. Bul maqsatqa jetý úshin, eń aldymen, zańdarymyz ádil bolýy kerek. О́ıtkeni, memlekettik saıasat zań arqyly júzege asyrylady. Reformalardyń basty maqsaty – halyqtyń turmys sapasyn jaqsartý», dedi Memleket basshysy.
Sondaı-aq Prezıdent aralas saılaý júıesiniń artyqshylyǵyn atady.
«Men ótken aptada elimiz úshin aıryqsha mańyzy bar birqatar zańǵa qol qoıdym. Onyń ishinde saılaý zańnamasyna engizilgen ózgeristerdi erekshe atap ótkim keledi. Jańa zańdar shyn máninde halyqtyq sıpatqa ıe ókildi organdar qalyptastyrady. Bizdiń mindetimiz – el aldynda abyroı-bedeli bar, qolynan is keletin jańa tulǵalardyń saıasatqa kelýine jaǵdaı jasaý. Aralas saılaý júıesi depýtattardyń atqarýshy bılikke yqpalyn kúsheıte túsedi. Sondaı-aq, óńirlerdiń máselesin memlekettik deńgeıde ýaqytyly kóterýge septigin tıgizedi», dep túsindirdi Memleket basshysy.
Osy tusta Prezıdent eldegi memlekettik qyzmetke aýqymdy reforma júrgizý qolǵa alynatynyn da jetkizdi.
«Partııa qurýdyń jańa ádil erejeleri engizildi. Bul qadam azamattardyń saıasatqa aralasý múmkindigin arttyrady. Olar memlekettik mańyzy bar sheshimderdi qabyldaýǵa qatysa alady. Sondaı-aq, elimizge basqarýshylardyń jańa býyny kerek. Ásirese, joǵary jáne orta býyn basshylarynyń quramyn jańartý asa mańyzdy. Sol úshin memlekettik qyzmetke aýqymdy reforma júrgizýdi josparlap otyrmyz», dedi Qasym-Jomrt Kemeluly.
Prezıdenttiń aıtýynsha, el ıgiligi úshin eńbek etkisi keletin bilimdi, daryndy azamattarǵa jol ashý qajet.
«Túrli salaǵa bilikti mamandar tartý úshin bárine birdeı múmkindik beriletin bolady. Merıtokratııa – basty qaǵıdatymyz. Ásirese, basqarý isine aımaqtardań shyqqan myqty menedjerlerdi tartýǵa basa mán beremiz. El ıgiligi úshin eńbek etkisi keletin bilimdi, daryndy azamattar ár aımaqta bar. Olarǵa jol ashý – memlekettiń mindeti», dedi Memleket basshysy.
Osy tusta Qasym-Jomart Kemeluly tutas Qazaqstannyń damýyna ár óńir súbeli úles qosyp otyrǵanyn erekshe atap ótti.
«Biz «Qýatty óńirler – qýatty el» qaǵıdatyn ustanamyz. Qazaqstannyń damýyna árbir aımaq súbeli úles qosyp otyr. Batysta munaı óndirilse, ortalyqta kómir, shyǵysta metall shyǵady. Soltústik aımaqtar astyǵymen áıgili bolsa, ońtústik tórt túligimen, baý-baqshasymen tanymal. Bir sózben aıtsaq, ár ólkeniń óz ereksheligi bar. Túptep kelgende, bári – bir-birinen bóle-jara qaraýǵa bolmaıtyn birtutas Qazaqstan», dep túıindedi el Prezıdenti.
