Ǵylym jáne joǵary bilim mınıstri Saıasat Nurbek Heriot-Watt ýnıversıtetiniń basshylarymen kezdesti. Kezdesý aıasynda brıtandyq joǵary oqý ornynyń Q.Jubanov atyndaǵy Aqtóbe óńirlik ýnıversıtetimen seriktestigi talqylandy. Bul týraly atalǵan mınıstrliktiń baspasóz qyzmeti habarlady.
Kelisim boıynsha Heriot-Watt ýnıversıteti Jubanov ýnıversıtetiniń bazasynda úsh bakalavrıat – «Munaı-gaz isi», «Elektronergetıka», «Kompıýterlik ınjenerııa» deńgeıindegi bilim berý baǵdarlamasyn, sondaı-aq «О́nerkásip menedjmenti» mamandyǵy boıynsha magıstratýra baǵdarlamasyn ashady. Bul mamandyqtar óńirdiń suranysyna qaraı tańdalyp otyr.
«Joǵary oqý oryndarynyń arasyndaǵy seriktestik otandyq tehnıkalyq jáne IT mamandardy birlese daıarlaýǵa baǵyttalǵan. Oqýdy aıaqtaǵan stýdentterge Heriot-Watt ýnıversıteti men Jubanov ýnıversıtetiniń qos dıplomy beriledi. Bul mamandyqtar ulybrıtanııalyq standart boıynsha oqytylyp, Heriot-Watt ýnıversıteti baqylaıdy. Talapkerlerdi qabyldaý kelesi oqý jylynda bastalady», dedi S.Nurbek.
Brıtandyq ýnıversıtettiń ókili Jubanov ýnıversıtetimen yntymaqtastyqty damytý týraly josparlarymen bólisti. Eki oqý orny arasynda akademııalyq utqyrlyq baǵdarlamalary belsendi damymaq.
Heriot-Watt ýnıversıteti – 1821 jyly negizi qalanǵan álemdegi jetekshi zertteý ýnıversıtetterdiń biri. Matematıka, hımııa ınjenerııasy, qurylys, elektr tehnıkasy jáne munaı-gaz isi pánderi boıynsha álemdik QS reıtınginde úzdik 300 ýnıversıtettiń qataryna kiredi.
