Túrkistandyq belsendi jarııalaǵan beınerolıkte aýdan ákimdiginiń qyzmetkeri Q.Janalıev jergilikti turǵyn G.Tınalıevaǵa qatysty mádenıetsizdik tanytyp, dóreki sóılegenin kórýge bolady.
«Saıram aýdanynyń ákimdigi halyqpen qalaı sóılesý kerektigin bile me ózi? Memlekettik qyzmet etıkasyna saı kelmeıtin sózdermen áıeldiń namysyna tıip turǵandaı. Osy vıdeodan túıgenim: Jańa Qazaqstan Saıram aýdanyna áli kelmegen sııaqty. Halyq oblys ákimi turmaq, aýdan ákiminiń mańyna jolaı almaı júrgende, ashyqtyq týraly áńgime aıtýdyń ózi artyq, dep jazdy A.Aıtahanova esimdi qoldanýshy.
Aýdan ákiminiń apparaty vıdeo astyna pikir qaldyryp úlgergen.
«Túrkistan oblysy ákimi apparatymen beınebaılanys arqyly aýdan ákiminiń qatysýymen apparattyq májilis ótken bolatyn. Ákimdik qyzmetkeri Q.Janalıev pen G.Tınalıeva arasyndaǵy oryn alǵan másele boıynsha Qazaqstan Respýblıkasy memlekettik qyzmetshilerdiń ádep kodeksi talaptaryna sáıkes tıisti sharalar qabyldanyp, nátıjesi týraly aldaǵy ýaqytta habarlanatyn bolady», delingen túsiniktemede.
