Shalǵaıdaǵy aǵaıynǵa sharapaty tıgen

Osyndaı jaǵdaıda elimizdiń tus-tusyn aralap, shalǵaıdaǵy aǵaıynǵa sharapatyn tıgizip júrgen «Medısınalyq po­ıyz­darǵa» halyq rııasyz rıza­shylyǵyn bildirip jatyr. Bıyl alty aıda bul shıpaly poıyz­dar 80 649 azamatqa tegin medı­sınalyq kómek kórsetti.

Máresine jetken jobany «Samuryq-Qazyna» AQ kompanııalar tobynyń atynan «Samruk-Kazyna Trust» áleýmettik jobalardy damytý qory Densaýlyq saqtaý mınıstrliginiń qatysýy­men, «Qazaqstan Temir Joly» UK AQ» janyndaǵy «Áleýmettik jobalar qory» korporatıvtik qorymen birlesip iske asyrdy. Bul jobanyń basty maqsaty – sapaly medısınalyq qyzmetke qol jetkize almaı otyrǵan, shalǵaıda jatqan stansalar men olarǵa jaqyn ornalasqan eldi mekenderdiń turǵyndaryn tegin medısınalyq tekserýden ótkizý.

Bıyl Qazaqstannyń tus-tu­syn­daǵy beketterde azamattar­ǵa zamanaýı dıag­nos­tıkalyq jabdyqtar ornatylǵan «Sala­matty Qazaqstan» jáne «Járdem» medısınalyq poıyz­darynyń mamandary kómek kórsetti. Medısınalyq po­ıyzdar búkil Qazaqstandy aralap shyqty. «Járdem» – Qyzylorda, Batys Qazaqstan, Aqtóbe, Atyraý, Mańǵystaý, Túrkistan, Jambyl oblystaryna, «Salamatty Qa­zaqstan» Almaty, Jetisý, Abaı, Shy­ǵys Qazaqstan, Pavlodar, Soltústik Qazaq­stan, Aqmola, Qostanaı jáne Qaraǵandy men Ulytaý oblystaryna bardy. Alty aıda poıyz mamandary 147 beket­tiń turǵyndaryn demalyssyz qabyldady.

Jumys barysynda barlyǵy Qazaq­stannyń 80 649 turǵynyna emdeý-kon­sýltasııalyq qyzmet kórsetilip, onyń ishinde 21 867 bala qaraldy. 5 097 sha­ǵyn hırýrgııalyq operasııa jasalyp, 26 587 adamǵa stomatologııalyq kómek kórsetildi. «Járdem» medısınalyq poıyz mamandary 59 balany súndettedi. Medı­sınalyq poıyzdarda bar­lyǵy 389 388 dárigerlik qabyldaý boldy. Joldyń jalpy uzyndyǵy – 22 009 shaqyrym.

Salystyra ketsek, pande­mııaǵa deıingi 2019 jyly jobaǵa qatysqan mamandar 273 eldi mekendi aralap, 63 myńnan asa turǵynǵa medısınalyq kómek kórsetti. Al dárigerlerge qaralý­dyń jalpy sany 209 249-dy qurady.

«Jalpy, «Samruk-Kazyna Trust» qorynyń 2022 jylǵa arnalǵan qaıyrym­dylyq bıýdjeti 10 mlrd teńgeni quraıdy. Onyń ishinde 9 aıda 7,1 mlrd teńge ıge­rildi. Bul rette el boıynsha 44 jo­ba iske asyrylýda, onyń 30-y bıyl Qam­qorshylyq keńestiń maquldaýyna ıe boldy. Sol jobalardyń biri – «Me­dısınalyq poıyzdar». Bizdiń qor­dan 760 mln teńgege jýyq qarjy jumsa­lyp, shalǵaıda ornalasqan eldi meken turǵyndaryna tegin medısınalyq kómek kórsetildi. Biz úshin bul jobanyń mańyzy zor. О́ıtkeni osy arqyly halyq densaýlyǵyn jaqsartýǵa, alys aýdandar men aýyl turǵyndaryna qajet qyzmet túrlerin qoljetimdi etýge múmkindik týdy. Men poıyz ujymdaryna, ondaǵy dárigerlerge alǵysymdy bildirgim kelip otyr. Aqjoltaı quramnyń arqasynda kóptegen el turǵyndary tegin ári sapaly medısınalyq kómek alyp, ómir súrý sapasy joǵarylaýda», dedi «Samruk-Kazyna Trust» áleýmettik jobalardy damytý qorynyń bas dırektory Alfııa Adıeva.

Dárigerlerdiń aıtýynsha, turǵyn­dardy tekserý kezinde qant dıabeti, glaý­koma, lıpoma, artroz, sozylmaly ho­le­­sıstıt, sozylmaly pankreatıt, aller­gııalyq dermatıt aýrýlary keńinen taral­ǵany baıqalǵan. Onkologııalyq aýrýlardan bólek, taǵy jıi kezdesetin derttiń biri – ınsýlt. Turǵyndardyń arasynda nevropatolog, hırýrg, kóz, qulaq jáne muryn dárigerlerine suranys kóp boldy.

«Eldi aralap júrgen kezde ártúrli jaǵdaıǵa tap bolamyz. Kóbine alys jat­qan eldi mekenderde dertti der kezin­de anyqtaıtyn arnaıy medısınalyq qurylǵylar bolmaı jatady, sondaı-aq maman tapshylyǵy da bar. Mysaly, Batys Qazaqstanda bolǵanymyzda 76 adamnan týberkýlez derti anyqtaldy. Sondaı-aq №10 razezde qıyn jaǵdaıǵa túsken sábıge kómek kórsetildi. Aýyr dárejedegi kúıik dıagnozymen (teri transplantasııasy) túsken bir jarym jastaǵy balaǵa kórsetilgen stasıonarlyq emdeýden keıin poıyz dárigerleri kúrdeli tańý júr­gizdi. Odan bólek, Begimbet stan­sasy­nyń 90 jastaǵy turǵyny Shaı­ken Baqyt­janovanyń úıine baryp, ekinshi ret tekserý júrgizdik. 2019 jylǵy sapar kezinde em-dom júrgizgenbiz. Bıyl kelgenimizdi estip, qyzy habarlasyp, anasynyń densaýlyǵyn tekserip berýdi surady. Biz óz kezegimizde analız alyp, naýqastyń júregin tekserdik. Rıza bolǵan keıýananyń aq batasyn da aldyq», dedi «Járdem» poıyzynyń bas dárigeri Aınur Eginbaeva.

Elimizdiń soltústik, shyǵys, ortalyq óńirlerin aralaǵan «Salamatty Qazaq­stan» dárigerleri de jumys barysyn­da ártúrli oqıǵalarǵa tap bolǵan. Má­se­len, Pavlodar oblysy Maraldy stan­sasynyń turǵynynda óte sırek kezde­setin dıagnoz – dekstrokardııa bar ekenin poıyz mamandary anyqtaǵan. Bul degenimiz – naýqastyń júregi oń jaǵynda ornalasqan. Árıne, mundaı jaǵdaıda em taǵaıyndalmaıdy, biraq bul aqparatty 47 jastaǵy turǵyn medısınalyq poıyzda tekserý kezinde alǵash ret bilgen. Sondaı-aq Soltústik Qazaqstanda 22 jastaǵy qyzda ehınokokkoz derti anyqtalyp, mamandar naýqasty operasııa jasatýǵa jibergen.

Medısınalyq poıyzdar mamanda­rynyń kómegin alǵan azamattyń biri – Gúzál Muhamed. О́zi Shymkent qalasynyń týmasy bolǵanymen, dárigerler qabyl­daýyna Atyraýda kelgen.

«Men jazda qydyryp, Atyraýdaǵy Muqyr stansasyna bardym. Sol jaqtaǵy tanystarymnan «Járdem» poıyzynyń kelgenin estidim. Kenetten ishim aýyryp, qatty mazamdy aldy. Sodan birden po­ıyz maman­daryna bardym. Poıyzda ÝDZ-ǵa túsip, analız tapsyrdym. Jedel túrde hırýrg «soqyrishek» dıagnozyn qoıyp, oblys­tyq emhanaǵa poıyz mamandary alyp bardy. Ol jerde de meniń dıagnozym­dy rastap, birden operasııa jasady. Dárigerlerge, uıymdastyrýshylarǵa alǵysym sheksiz», dep óz rızashylyǵyn bildirdi ol.

Joba alǵash ret 2010 jyly iske qosylyp, 2019 jylǵa deıin jyl sa­ıyn iske asyrylyp keldi de, koronavırýs indeti kezinde úzilis aldy. Osy kezeń ishinde «Densaýlyq», «Járdem» jáne «Salamatty Qazaqstan» atty úsh konsýltasııalyq-dıagnostıkalyq poıyz Qazaqstannyń shalǵaıda ornalasqan 1 870 eldi mekenin aralap, 569 530 turǵyn tekserýden ótti. 17 078 shaǵyn hırýrgııalyq operasııa jasalyp, 148 546 adamǵa stomatologııalyq kómek kórsetildi.