Senatta Úkimet basshysy sybaılas jemqorlyqqa jol bergen sheneýnikterden tárkilengen aqshany alý úshin Qarjy mınıstrliginiń arnaıy esepshoty qarastyrylǵanyn atap ótti.
«Quqyq qorǵaý organdary jemqor sheneýnikterge de tıisti sheshim shyǵarǵan. Aqsha qarjy mınıstrliginiń arnaıy shotyna túsedi jáne qazirdiń ózinde túsip jatyr. Qazirdiń ózinde 50 mıllıard teńgege jýyq qarjy tústi. Taıaý bolashaqta bul soma 100 mıllıard teńgege deıin óskenin kútýdemiz. Qarajat mektep salýǵa jáne mektepterge qosymsha qurylystar salýǵa baǵyttalady», dep túsindirdi Úkimet basshysy.
Onyń aıtýynsha, qazir Bilim mınıstrligi tıisti qujattamany daıyndap jatyr.
Eske salaıyq, 1 qyrkúıekte Qasym-Jomart Toqaev halyqqa Joldaýynda jemqorlardan tárkilengen aqshany Qazaqstanda mektep salýǵa jumsaýdy tapsyrǵan bolatyn.
«Jemqor sheneýnikterden memleketten zańsyz alǵan barlyq qarajatty alyp, mektep salýǵa jumsaý kerek», degen edi Memleket basshysy.
