«Qazaqstan barlyq memlekettiń terrıtorııalyq tutastyǵyn sózsiz qoldaıdy, sondaı-aq BUU Jarǵysyn múltiksiz saqtaý qajet dep esepteıdi. Bul – bizdiń elimizdiń negizgi múddesine tolyq saı keletin mańyzdy qaǵıdat. Sondyqtan biz osy qaǵıdatqa árdaıym basymdyq beretin bolamyz», dedi Prezıdent.
Sammıt barysynda Qasym-Jomart Toqaev Túrki memleketteri uıymynyń mártebesin nyǵaıtýǵa zor úles qosqan Túrkııa Respýblıkasynyń Prezıdenti Rejep Taııp Erdoǵanǵa alǵys bildirdi.
«Bizdiń birligimiz jyl ótken saıyn nyǵaıyp keledi. Sonyń arqasynda Túrki áleminiń halyqaralyq arenadaǵy saıası salmaǵy edáýir artty. Túrkııa Respýblıkasynyń Prezıdenti, Joǵary Mártebeli Rejep Taııp Erdoǵan bir jyl boıy Túrki memleketteri uıymynyń tóraǵasy mindetin atqardy. Osy ýaqyt ishinde uıymnyń mártebesin kóterip, yqpalyn nyǵaıtýǵa zor úles qosty. Sol úshin baýyrym – Rejep myrzaǵa alǵys aıtamyn. Respýblıka atanǵanyna kelesi jyly bir ǵasyr bolatyn baýyrlas Túrkııa eli ózara yntymaqtastyǵymyzdy nyǵaıtýǵa zor úles qosa beredi dep senemin. Osy oraıda, men qurmetti Rejep beıdi «Túrki áleminiń eń joǵarǵy ordenimen» marapattaý týraly bastama kóterdim. Bul usynysym biraýyzdan qoldaý tapty. Sol úshin barshańyzǵa rızashylyǵymdy bildiremin», dep atap ótti Memleket basshysy.
Sózin qorytyndylaı kele, Prezıdent uıymnyń tóraǵalyǵy men hatshylyǵyn alǵan О́zbekstan men Qyrǵyzstan ókilderiniń jumysyna tabys tiledi.
«Sózimniń sońynda uıymǵa tóraǵalyq etý mindeti О́zbekstanǵa berilýine baılanysty ózbek baýyrlarymyzǵa taǵy da tolaǵaı tabys tileımin! Budan bólek, uıymnyń Bas hatshysy laýazymyn atqarý kezegi baýyrlas Qyrǵyzstan ókiline ótedi. Osy oraıda, 2018 jyldan beri Túrki memleketteri uıymynyń Bas hatshysy qyzmetin atqarǵan Baǵdat Ámireevke alǵys aıtamyn. Al jańadan taǵaıyndalǵan Bas hatshy Kýbanychbek О́mirálıevtiń jumysy jemisti bolýyna tilektestik bildiremin», dep qorytyndylady Qasym-Jomart Kemeluly.
