«Ahmet kósheleriniń kerýeni» dep atalatyn oblystyq baıqaý bıyl sáýir-qazan aılary aralyǵynda ótti. Uıymdastyrýshylar konkýrsqa qatysqan ár kósheniń tazalyǵy men ásemdigine, turǵyn úılerdiń syrtqy kelbeti men aýla kórkine, ult ustazynyń qaıratkerlik ǵumyrnamasy men baı murasynyń aýyl turǵyndary arasynda nasıhattalýyna basa mán bergen.
Baıqaý qorytyndysy boıynsha Torǵaı aýylyndaǵy A.Baıtursynuly atyndaǵy kóshe bas júldeni jeńip aldy. Al «Eń ásem, eń taza kóshe» atalymy boıynsha Áýlıekól turǵyndary jeńiske jetti.
Oblystyq mádenıet basqarmasynyń basshysy Erlan Qalmaqov baıqaý jeńimpazdaryna arnaıy dıplomdar men aqshalaı syılyqtar tabys etti.
– Ult ustazynyń esimimen baılanysty mektep, ýnıversıtet, mekeme, kóshelerdiń qaı-qaısysynyń da atyna zaty saı bolǵany mańyzdy. Biz baıqaýdy kópke úlgi bolsyn, bıyl IýNESKO kóleminde álemdik deńgeıde atalyp ótip jatqan ult ustazynyń toıyn shalǵaı aýyldardyń turǵyndary da sezinsin, oı túıip ónege juqtyrsyn degen oımen uıymdastyrdyq. Jeńimpaz kóshelerge tabys etilip jatqan aqshalaı syılyqtar naqty bir adamnyń qaltasynda ketpeıdi. Bul qarjy belsendi turǵyndardyń qalaýymen sol kósheniń kem-ketigin túzetýge jumsalatyn bolady. Mysaly, Qostanaı qalasyndaǵy A.Baıtursynuly jáne Ál-Farabı kósheleriniń qıylysynda Alash arystarynyń esimderi jazylǵan belgi taqta bar. Jazýy kómeskilenip ketken. Kósheler baıqaýynyń arnaıy syılyǵyna ıe bolǵan A.Nıkıforov atyndaǵy daryndy balalarǵa arnalǵan beıneleý óneri mektebiniń basshysy Tatıana Kýzmenkova Aqań kóshesindegi osy olqylyqtyń ornyn toltyramyz dep otyr, – dedi basqarma basshysy.
Naýyrzym aýdanynyń ortalyǵy – Qarameńdi aýylyndaǵy Aqań atyndaǵy kóshe «Yntymaǵy jarasqan kóshe» atalymy boıynsha úzdik shyqty. Bul kóshede eki mektep, meshit, jıyrma shaqty turǵyn úı ornalasqan.
– Kóshemiz ortalyqta, óte taza, keń ári jaryq. Oblystyq baıqaýǵa turǵyndar asa jaýapkershilikpen belsene qatysty. Sáýir aıynan bastap abattandyrý jumystaryn júrgizdik. Jańaǵy eki mekteptiń ustazdar ujymy men oqýshylary, aýyldaǵy kúlli mekemelerdiń qyzmetkerleri, ózimiz turǵyndar bolyp erte kóktemnen bastap qar túskenshe on shaqty ret senbilik jasadyq. Osy kóshede ornalasqan eń ádemi úı, eń taza aýla baıqaýlaryn ótkizdik. Eski qorshaýlardy aýystyryp, kóshe jaǵalaı tal otyrǵyzyp, gúl ektik. Osy sharalardyń bári 19 tamyz kúni qorytyndylanyp, jeńimpazdar marapattaldy. Osyǵan oraı kóshemizde úlken mereke uıymdastyrylyp, eki kıizúı tigildi, sahna bezendirildi. Oǵan mektep oqýshylary, aýyldyń qarapaıym turǵyndary, aýdan ákimshiligi men jergilikti sharýashylyqtardyń basshylary, eńbek ardagerleri qatysty. Ahmet kóshesi merekesiniń aıasynda ult ustazynyń óleńderi oqylyp, án baıqaýy, músháıra ótti. Aýdandyq kitaphana arnaıy kitap kórmesin uıymdastyryp, jastar «Ult ustazynyń ulaǵaty» atty tanymdyq kórinisti sahnalady. Sporttyq oıyndar, jármeńke uıymdastyryldy. О́zimizdiń aýyldan shyqqan ónerpazdar tamasha konsert qoıdy. Jergilikti sharýa qojalyqtarynyń demeýimen Ahmet Baıtursynuly kóshesiniń turǵyndaryna úlgili otbasy, kópbalaly otbasy, baıyrǵy turǵyn, ınternasıonal otbasy, sol kúni shańyraq kótergen jas otbasy degen syılyqtar berildi, – deıdi Qarameńdi aýylyndaǵy A.Baıtursynuly atyndaǵy kósheniń turǵyny Gúlnar Ahmetova.
Saltanatty is-sharanyń sońynda halyq aqyny Ásııa Berkenova men Qazaqstan Jazýshylar odaǵy oblystyq fılıalynyń basshysy Januzaq Aıazbekov bastaǵan bir top qalamger ult ustazy Ahmet Baıtursynulynyń 150 jyldyǵy qurmetine shyǵarylǵan estelik medalmen marapattaldy.
Qostanaı oblysy
