Janat Elımanov Qasym-Jomart Toqaevqa agenttiktiń bıylǵy 10 aıda atqarǵan jumystary týraly esep berdi.
Memleket basshysyna qylmystyq isterdi jappaı qozǵaý tájirıbesiniń joıylǵany jáne adal bıznesti qylmystyq qýdalaýdyń azaıǵany jóninde baıandaldy. Agenttik tóraǵasy sotqa deıingi tergep-tekserý amaldarynyń sany jyl saıyn azaıyp kele jatqanyn atap ótti. Atap aıtqanda, ótken jylmen salystyrǵanda tirkelgen ister sany 30 paıyzǵa tómendegen.
Janat Elımanovtyń aıtýynsha, qabyldanǵan sharalar keltirilgen shyǵyndardy óteýge, 300 mıllıard teńgeden astam aktıvti qaıtarýǵa, sondaı-aq 25 uıymdasqan qylmystyq toptyń jolyn kesýge múmkindik berdi. Aqshany qolma-qol shyǵarýmen aınalysatyn 119 toptyń qyzmetine tosqaýyl qoıyldy.
Budan bólek, Prezıdentke 25 qarjy pıramıdasy joıylyp, jábirlenýshilerdiń 8,3 mıllıard teńge shyǵyny ótelgeni habarlandy.
Agenttik tóraǵasynyń derekterine sáıkes, qarjylyq pıramıdalarmen kúres aıasynda zańsyz mazmundaǵy 8,8 myńǵa jýyq saıt pen akkaýnt buǵattalǵan. Prezıdenttiń tapsyrmasyn oryndaý sheńberinde qarjylyq barlaý qyzmeti esirtki satatyn 15 ınternet-dúkendi áshkerelegen. Olardyń jalpy saýda aınalymy 4,4 mıllıard teńgeni qurap, 27 myńnan asa azamatty qamtyǵany anyqtaldy. Bul isterge qatysty materıaldar Ishki ister mınıstrligi men Ulttyq qaýipsizdik qyzmetine joldandy. Sıfrlyq aktıvterdi paıdalana otyryp, qylmystyq jolmen tapqan kiristi jylystatýǵa jáne terrorızmdi qarjylandyrýǵa qarsy kúres aıasynda Agenttik Binance iri halyqaralyq krıptobırjasymen yntymaqtastyq týraly memorandýmǵa qol qoıǵan.
Sonymen qatar Prezıdentke Qazaqstannyń «qarjyny jylystatýǵa qarsy kúres» ulttyq júıesi FATF talaptaryna sáıkestigi boıynsha О́zara baǵalaýdan ótip jatqany jóninde málimet berildi.
Kezdesý sońynda Memleket basshysy qarjy pıramıdalary men alaıaqtyq áreketterdiń jolyn kesý boıynsha jumysty jalǵastyrýdy, sondaı-aq Agenttiktiń óz ishinde jemqorlyqqa qarsy is-qımyl sharalaryn kúsheıtýdi tapsyrdy.
