Prezıdent Qasym-Jomart Toqaev joǵary bilim berý salasynda tehnıkalyq mamandyqtarǵa basymdyq berýdi tapsyrǵan edi. Bul mindet «Bolashaq» baǵdarlamasyn qaıta baǵdarlaý barysynda da eskerildi.
– IT jáne ınjenerlik mamandyqtarǵa granttar sany ótken jylmen salystyrǵanda 36 paıyzdan 60 paıyzǵa deıin ulǵaıtyldy. Joǵary oqý oryndarynyń tizimine 23 jetekshi tehnıkalyq ýnıversıtet endi. Jalpy, bul tizimge álemniń 26 elinen 236 úzdik joǵary oqý orny kiredi. Bıyl 14 qazanda «Bolashaq» baǵdarlamasy boıynsha qujat qabyldaý aıaqtaldy. Onyń qorytyndysynda ótinimderdiń kóbi tehnıkalyq mamandyqtar boıynsha túsken. Sonymen qatar Memleket basshysynyń tapsyrmasymen aldaǵy ýaqytta ınjenerlik-tehnıkalyq mamandar úshin arnaıy jeńildik sanatyn engizý josparda bar. Tehnıkalyq mamandyqty tańdaǵan úmitkerler qujat tapsyrǵanda JOO-dan shaqyrýdy usynýǵa mindetti bolmaıdy, – dedi Á.Janǵozın.
Onyń aıtýynsha, tehnıka mamandary memlekettik tilden emtıhan tapsyrǵanda nátıjesi keminde V1 QAZTEST sertıfıkaty bolýy kerek. Al shet tilden nátıjesi 9,0 baldan keminde 5,0 ball IELTS sertıfıkatyn tapsyrady. Jeńildigi bar úmitkerler dıplomynyń ortasha baly – GPA 4,00-ten keminde 3,00 bolýǵa tıis.
Sondaı-aq Halyqaralyq baǵdarlamalar ortalyǵynyń bastamasymen «Bolashaq» stıpendııasy aıasynda medısına qyzmetkerlerine qoıylatyn talaptardy jetildirý qarastyrylyp otyr.
– Statıstıkaǵa súıenetin bolsaq, kadrlardy daıarlaýdaǵy negizgi másele – shet tilin meńgerý deńgeıiniń tómendigi. Densaýlyq saqtaý qyzmetkerleri úshin múmkindikterdi keńeıtý jáne qyzyǵýshylyǵyn arttyrý maqsatynda arnaıy jeńildik sanatyn engizýdi qarastyryp otyrmyz. Olarǵa bir jyldyq tildik daıyndyqtan ótip, stıpendııa taǵaıyndalǵannan keıin sheteldik ýnıversıtetke túsý múmkindigi beriledi. Aıta keterligi, buryn jeńildik tek aýyldyq jerlerden kelgen úmitkerlerge qarastyrylatyn. Aldaǵy ýaqytta aýyldyq úmitkerler úshin de múmkindikterdi keńeıtý josparda bar. Atap aıtqanda, olarǵa aǵylshyn tilinen IELTS emtıhanynyń baly 6,0 baldan 5,0 balǵa deıin tómendetiledi. Buǵan qosa bir jyldyq tildik daıyndyqtan ótý múmkindigi beriledi, – dedi ortalyq basshysy.
Al taǵy bir ózgeriske keletin bolsaq, aldaǵy ýaqytta «Bolashaq» stıpendııasyn qosa qarjylandyrý mehanızmin iske qosý josparlanyp otyr. Iаǵnı úmitkerde joǵary oqý ornynan, jumys berýshiden nemese demeýshiden úzdik sheteldik ýnıversıtette oqýǵa grant bolsa, baǵdarlama eki jaqqa ushyp qaıtýdy, vızalyq alymdardy, medısınalyq saqtandyrýdy, aı saıynǵy stıpendııany jáne oqý materıaldaryn satyp alýǵa járdemaqyny óteıdi. Sonymen qatar eńbekpen óteý merzimi 1 jylǵa deıin azaıtylady.
Á.Janǵozınniń aıtýynsha, qazirgi tańda Fortune-500 álemdik deńgeıdegi úzdik kompanııalarda taǵylymdamadan ótý úshin eńbekpen óteý merzimin shegerýge qatysty ózgerister de qarastyrylyp jatyr.
