Qoǵamdyq kólikterge arnalǵan arnaıy jolaqtar jasalǵanymen, turǵyndar uzyn-sonar kepteliste uzaq ýaqyt boıy aıaldamada turýǵa májbúr. Osyny alǵa tartqan Prezıdent: «Qazir Almatyda jolaýshy tasymalynyń negizgi úlesi avtobýstar men trolleıbýstarǵa tıesili. Sonymen qatar baǵdarlyq jeli jetkilikti túrde tıimdi uıymdastyrylmaǵan», deı otyryp, qalalyq baǵdarlardyń kóbi óte uzyn ekenin, qala jáne qala mańyndaǵy qoǵamdyq kólikter bir-birimen nashar baılanysqanyn, tasymaldaý úshin yńǵaıly kólik toraptary joq ekenin atap kórsetti. Bul jaǵdaıdy tez arada ózgertý úshin qoǵamdyq kólikterdiń tartymdylyǵyn dáıekti túrde arttyryp, sonymen birge jeke kólikterdi paıdalanýdy qysqartýdy yntalandyrý kerektigin aıtty. Bul rette metropolıten jelisin keńeıtýdi jalǵastyra berý qajettigine toqtaldy. Bul – álemdik tájirıbede bar durys sheshim. О́ıtkeni tirshiligi qaınap jatqan alyp megapolıstegi kólik qozǵalysyn birden azaıtý múmkin emes. Sondyqtan azamattardy osy bastamaǵa yntalandyrý úshin metro beketteriniń áleýetin kúsheıtken abzal. Metro beketteri qalanyń kez kelgen núktesin bir-birimen baılanystyratyndaı deńgeıge jetse, turǵyndar kólikten góri ózderi úshin tıimdi metrony tańdar edi.
Prezıdent mektepter men balabaqshalarǵa kólikpen kedergisiz barý máselesine nazar aýdarý kerektigin aıtty. Sebebi tańerteń, túste jáne keshki ýaqytta qala joldaryndaǵy kólik keptelisine atalǵan nysandarǵa baratyndar da áserin tıgizip otyr. Jol men kólik salasyndaǵy bul problemany eńserip, tıimdi sheshimder ázirleý isine turǵyndar men táýelsiz sarapshylardy belsendi tartý qajet. Prezıdenttiń bul ıdeıasy júıeli júzege asar bolsa joldaǵy qaýipsizdik pen ómir sapasynda oń úrdister qalyptasar edi.
Máýlen SYBASh,
«Kómek» qaıyrymdylyq jobasynyń jetekshisi, volonter
