Bizdiń qaıda oqyǵanymyzdy, buǵan deıin qandaı jumystar jasaǵanymyzdy surady. Áriptesim Tımýr Ermuhametov ekeýmiz múmkindiginshe buǵan deıin jasaǵan jumystarymyz týraly qysqasha aıtyp berdik. Memleket basshysy bizden «Jeke sheberhanalaryń bar ma?» dep surady. Biz bar ekendigin aıttyq. «Bul jumys maǵan qatty unady, árbir detalyna muqııat kóńil bólip jasaǵan ekensińder. Qanshama jumystardy kórip júrmin, keıbir músinderge kóńilim tolmaıtyny ras. Al sizderge kóp rahmet, jumystaryń tabysty bolsyn!» dedi. Memleket basshysynyń bul baǵasy bizdiń shabytymyzǵa qanat bitirgendeı boldy. Buıyrsa aldaǵy ýaqytta budan da jaqsy jumystar isteýge tyrysamyz.
Árıne, ár tulǵaǵa arnalǵan eskertkish sol tulǵanyń kelbetimen qosa, ishki jan-dúnıesin de ashýy tıis. Al ol úshin úlken izdenis kerek.
Ult ustazyna qoıylǵan eskertkishke keler bolsaq, músin qoladan quıylǵan, tuǵyry granıt tastan jasalǵan. Bıiktigi – 3,5 metr, tuǵyry – 1,5 metr, jalpy bıiktigi 5 metr bolady. Alash arysy Ahmet atamyzdy bilmeıtin kisi joq shyǵar. Ult ustazynyń beınesin jasaýda ol kisiniń muraǵattardaǵy sýretterin qaradyq, jas kezindegi, qartaıǵan shaǵyndaǵy beınelerin izdedik. О́mir joly týraly qaıtalap oqyp shyqtyq. Bul salada 10 jyldan beri jumys istep kele jatyrmyz. Buǵan deıin de kóptegen tulǵanyń eskertkishin jasaýǵa atsalystyq. Bári de jurttyń kóńilinen shyqqan týyndylar.
Máselen, buǵan deıin Almatyda asharshylyq qurbandaryna qoıylǵan eskertkishtiń beınesin jasadyq. Astana qalasyna qoıylǵan Ábý Nasyr ál-Farabı, Almatyda Nurtas Ońdasynov, Shámshi Qaldaıaqovtyń eskertkishteri – bizdiń týyndylar. Jaqynda Taraz qalasynda qoıylǵan Sherhan Murtaza atamyzdyń eskertkishi de bizdiń eńbek. Tulǵalarǵa arnalǵan týyndynyń sátti shyǵýy, onyń syrtqy kelbeti ǵana emes, ishki jan-dúnıesine tereń úńilgendigimizden bolar. О́ıtkeni biz ózimiz kirisip, jasaıtyn tulǵanyń ómirimen tolyq tanysamyz, oqyp zertteımiz, sýretterin, beınematerıaldaryn aqtaramyz, sol arqyly eskertkishke minezin, jan-dúnıesin sińirýge tyrysamyz.
Aıdos BÚRKITBAEV,
músinshi
