Máselen, keıingi 7 aıda, ıaǵnı osy jyldyń 1 mamyrynan bastap 15 qarashaǵa deıin Astanaǵa 259,2 myń tonna kómir jetkizilgen. Qazir elimizdegi temirjol tuıyqtaryndaǵy qatty otynnyń kólemi 317,8 myń tonnadan asady. Onyń ishinde bas qaladaǵy temirjol tuıyqtarynda kómir qory shamamen 19,2 myń tonnaǵa teń. Aqmola oblysynda – 58 myń tonna. Bul pýnktter tıisti ınfraqurylymmen, onyń ishinde tıep-túsirý tehnıkasymen tolyq jabdyqtalǵan.
Astanadaǵy temirjol tuıyqtarynan kómir Aqmola oblysynyń taıaý mańdaǵy eldi mekenderine (Jibek joly, Talapker, Qosshy jáne Arshaly jáne taǵy basqalary) satylady.
Indýstrııalyq damý komıteti tóraǵasynyń orynbasary Turar Jalmaǵambetovtyń aıtýynsha, halyqty qatty otynmen qamtamasyz etý jumystary Indýstrııa jáne ınfraqurylymdyq damý mınıstrliginiń turaqty baqylaýynda. Bıyl jylytý maýsymyna daıyndyq naýryz aıynda bastaldy. Osyǵan baılanysty qazir kúndelikti monıtorıng júrgizilip keledi.
– Mınıstrlik turaqty negizde jergilikti atqarýshy organdar, «Qazaqstan temir joly» ulttyq kompanııasy jáne kómir razrezderimen qatty otynmen qamtamasyz etýge baılanysty, sondaı-aq óńirlerde dúrbeleńdi boldyrmaý úshin kúndelikti keńes ótkizip keledi. Baǵanyń ósýine jol bermeý maqsatynda tamyzda barlyq kompanııa baǵany bekitý týraly memorandýmǵa qol qoıdy. Kómirdiń ortasha baǵasy byltyrǵy deńgeıde saqtalyp otyr, – deıdi T.Jolmaǵambetov.
Onyń aıtýynsha, Indýstrııa jáne ınfraqurylymdyq damý mınıstrligi óńirlerdiń ákimdikterimen birlesip, kómirdi jetkizý jáne bólý máselelerin erekshe nazarda ustap otyr. Halyqty qatty otynmen qamtamasyz etý úshin jaýapty vedomstvo birqatar shara qabyldady. Onyń ishinde aldaǵy jylytý maýsymynda qatty otyn tapshylyǵyn boldyrmaý úshin quzyrly organ jylytý maýsymy kezeńinde avtokólikpen kómirdi áketýdi 6 aıǵa shekteý týraly buıryqty qabyldady. Atalǵan sheshim kómir razrezderi jáne óńirlik ákimdiktermen birlesip ázirlendi.
– Qazir qandaı da bir dúrbeleń joq. Múmkin bul adamdardyń kómir qoryn aldyn ala jınaqtap alýymen baılanysty shyǵar. Sondaı-aq qalanyń kógildir otynǵa kóshirilip jatqanyn eskerý qajet. Qazir halyqtyń edáýir bóligi kómirdi satyp alǵan. Vagondardy jiberý men olardy tazalaýǵa qatysty másele týyndap otyrǵan joq, – dedi kómir qoımasynyń meńgerýshisi Altynbek Esjanov.
Bul rette kómirdiń qory, baǵasy jáne bar-joqtyǵyn anyqtaý týraly suraqtardyń jaýabyn 109 senim telefon nómirine habarlasý arqyly alýǵa bolady. Temirjol tuıyqtaryndaǵy kómirdiń baǵasy, onyń ishinde Astanadaǵy qatty otynnyń quny týraly aıtsaq, Maıkóbe kómiriniń tonnasy – 13 200 teńge, Shubarkól kómiriniń baǵasy – 13 900 teńge, Qarajyra kómiriniń quny – 14 600 teńge.
Sonymen qatar Halyk Market platformasyna óńirlik operatorlardy qosý jumystary jalǵasyp jatyr. Osy oraıda zamanaýı sheshimderdiń qatty otyndy tikeleı temirjol tuıyqtarynan kezeksiz satyp alýda septigi mol ekenin aıta ketken abzal. Bul óz kezeginde halyqty jylytý maýsymyna ýaqtyly daıyndaýǵa múmkindik beredi. Atalǵan qanatqaqty jobaǵa Qyzylorda, Jambyl, Pavlodar, Qostanaı, Qaraǵandy, Soltústik Qazaqstan jáne Aqmola oblystary men Almaty qalasy qosyldy.
