Jármeńke jumysyna 55 jumys berýshi qatysyp, 1400-den astam bos jumys ornyn usyndy. Elordalyq uıymdar arasynda qurylysshylarǵa, ınjenerlerge suranys joǵary. Muǵalimder de suranysqa ıe.
«Mundaı jármeńke bıyl toǵyzynshy ret ótti. Qazirgi ýaqytta qurylys, densaýlyq saqtaý, óndiris, tamaq óndirisi salasyndaǵy kadrlarǵa qajettilik bar. Sondyqtan biz bos jumys oryndary bar jumys berýshilerdi shaqyrdyq. Jyl sońyna deıin jastar úshin taǵy bir jármeńke ótkizýdi josparlap otyrmyz», dedi Astana qalasynyń halyqty jumyspen qamtý ortalyǵynyń bólim basshysy Baqyt Raqysheva.
О́tinish berýshilerdiń pikirinshe, mundaı is-sharalardyń basty qundylyǵy - bir kúnde birneshe jumys berýshimen bir nysannyń ishinde suhbattasý múmkindigi.
«Eger jaqsy jumys izdeseńiz, izdeý ádisiniń barlyq túrin qoldanýyńyz kerek, óıtkeni keıbir kompanııalar bos jumys ornyn ınternetke jarııalamaıdy. Sonymen qatar qoıylatyn talaptardy oqyǵanda, túsinbegen jerleri bolýy múmkin. Al mundaı jármeńkelerde barlyq málimetti birden naqtylaýǵa bolady», dep atap ótti izdenýshi Gúljan Ábdirazaqova.
Jumys berýshilerdi Astana qalasynyń halyqty jumyspen qamtý ortalyǵy ótkizetin baǵdarlamalar qyzyqtyrady. Olar: NEET sanatyndaǵy azamattardy, halyqtyń áleýmettik osal toptarynyń ókilderin jáne zeınetkerlik jasqa deıingi adamdardy jumysqa ornalastyrýǵa baǵyttalǵan jobalar. Osy jobalar aıasynda memleket joǵaryda atalǵan sanattaǵy qyzmetkerler úshin jalaqynyń 35%-dan 50%-ǵa deıin tóleıdi.
«Qaladaǵy bos jumys oryndaryna arnalǵan jármeńkelerge únemi qatysamyz. Bizdiń kompanııa qurylyspen aınalysady, tıisinshe mamandarǵa únemi muqtajbyz. Sondyqtan biz jumys tájirıbesi joq túlekterdi qabyldaýǵa jáne olardy óz betinshe oqytýǵa daıynbyz. Memleket bizge qyzmetkerdiń taǵylymdamasy kezinde jalaqynyń bir bóligin tóleý arqyly kómektesedi», dedi «Úmit» kompanııasynyń kadrlar bóliminiń basshysy Natalıa Kagırmanova.
Bul jármeńkede jumys berýshiler usynatyn ortasha jalaqy 150-den 400 myń teńgege deıin boldy.
Aıta keteıik, jyl sońyna deıin Astanada 28 myń jańa jumys orny ashylady. Bos oryndar jármeńkesiniń maqsaty - azamattardy jumysqa ornalastyrý. Búgingi jalpyqalalyq jármeńkege 400-den astam jumys izdeýshi qatysty.
