Medısınalyq uıymdar qyzmet jetkizýshi retinde Medısınalyq saqtandyrý qorymen shart jasaı otyryp, shartta kórsetilgen medısınalyq qyzmetterdi tolyq kólemde usynýǵa mindetteme alady jáne qoljetimdilik pen sapa úshin jaýapty bolady.
«Qor turǵyndarmen keri baılanys ornatyp, turaqty túrde jumys júrgizedi. Mysaly, beıindi mamandarǵa, dıagnostıkalyq qyzmetterge jete almaý nemese olardy uzaq kútý, sol sekildi ýchaskelik qyzmetterdi (jalpy praktıka dárigeri, terapevt-dáriger, pedıatr-dáriger), jedel medısınalyq kómek brıgadasyn uzaq kútý, t.b. boıynsha azamattardan «emhana kórsetilimder bolsa da, ótkizý múmkindiginiń joqtyǵyna silteme jasaı otyryp, konsýltasııalyq-dıagnostıkalyq qyzmetke jiberýden bas tartady» degen ótinishterdi jıi alamyz. Mundaı jaǵdaıda, qyzmet jetkizýshi Qor bazasynda turatyn medısınalyq uıymdar qatarynan birlesip oryndaýshyny tartýǵa mindetti. Eger birlesip oryndaý sharty eshkimmen jasalmasa, onda pasıentti osy qyzmet túri boıynsha Qormen kelisimshartqa otyrǵan medısına uıymdarynyń birine jiberýge tıis, joldama boıynsha kórsetilgen qyzmet qorytyndylary negizinde shart avtomatty túrde jasalady», dep atap ótti «Áleýmettik medısınalyq saqtandyrý qory» KeAQ Astana qalasy boıynsha fılıalynyń dırektory Nurlybek Qabdyqaparov.
Onyń aıtýynsha, josparly medısınalyq kómek pasıenttiń ómirine qaýip tóndirmeıtin aýrýlar men jaǵdaılar kezinde kórsetiletinine jáne sál keıinge qaldyrý pasıenttiń jaı-kúıiniń nasharlaýyna ákep soqpaıtynyna qaramastan, pasıent konsýltasııalyq nemese dıagnostıkalyq qyzmetti 10 kúnnen artyq kútpeýi tıis. Bul monıtorıng erejelerimen bekitilgen
Konsýltasııalyq-dıagnostıkalyq qyzmetti qalaı alýǵa bolady?
Kez kelgen konsýltasııalyq-dıagnostıkalyq qyzmetti pasıentke emdeýshi dáriger taǵaıyndaıdy. Ol naýqastyń jaǵdaıyn, shaǵymdaryn, aýrýdyń belgilerin zerdeleıdi. Tıisti kórsetilimder bolsa dáriger KT, MRT nemese basqa da zertteýler júrgizýge joldama jazady. Qyzmetti josparly túrde alý úshin pasıent «saqtandyrylǵan» mártebesine ıe bolýy tıis, óıtkeni emhana deńgeıinde bul qyzmetter MÁMS aıasynda kórsetiledi.
«Bizdiń emhanamyzdyń dıagnostıka bólimshesinde birneshe fýnksıonaldyq dıagnostıka kabınetteri jumys isteıdi. Túrli zertteýler júrgiziledi, sonyń ishinde: EKG, Spırografııa, Tredmıl test, HMEKG, AQTM (SMAD), ÝDZ, kompıýterlik tomografııa, sondaı-aq rentgen, flıýoro, mammografııalyq kabınetter, mektepterge barýǵa múmkindik beretin flıýorografııalyq mashına bar, endoskopııalyq kabınet jumys isteıdi. Sondyqtan bizde sala mamandarynyń qoljetimsizdigi nemese uzaq kútý, dıagnostıkalyq qyzmetter, ýchaskelik qyzmet (JTD, dáriger-pedıatr) qabyldaýyn uzaq kútý, jedel medısınalyq járdem brıgadasyn uzaq kútý, t.b. sebepterge baılanysty pasıentter tarapynan shaǵym bolǵan emes» deıdi Astana qalasyndaǵy №9 emhananyń fýnksıonaldyq dıagnostıka bólimshesiniń meńgerýshisi, kardıolog dáriger Anıra Qaıratqyzy Ábeýstanova.
Beıindi maman-dárigerlerdiń konsýltasııalary, KT/MRT, rentgen jáne dıagnostıkalyq qyzmettiń basqa da túrleri MÁMS júıesinde saqtandyrylǵan azamattarǵa emdeýshi dárigerdiń joldamasy boıynsha tegin kórsetiledi. Olar úshin qosymsha aqy talap etilmeýi kerek. Eger emhana atalǵan qyzmetterdi ózi usyna almasa, onda oryndaý sharty boıynsha pasıenttiń basqa klınıkadan alýyn qamtamasyz etýi tıis.
Alaıda, pasıent óz emhanasyna barmaı, basqa medısınalyq ortalyqtarǵa tikeleı baryp, konsýltasııalyq-dıagnostıkalyq qyzmetti aqyly alatyn jaǵdaılar da kezdesedi.
«Keıde biz áleýmettik jelilerden pasıentke joldama berilmegeni jáne olar aqyly túrde qyzmet alǵany týraly shaǵymdardy kóremiz. Mundaı jaǵdaılarda pasıenttiń quqyǵyn qorǵaýshy retinde Qor iske qosylady. Biraq, keıde, tekserý nátıjesinde pasıent tipti óz emhanasyna júginbegeni, biraq dereý basqa jerde aqyly tekserýden ótýge sheshim qabyldaǵany anyqtalyp jatady. Sondyqtan, azamattardy TMKKK sheńberinde jáne MÁMS júıesinde medısınalyq qyzmetterdi paıdalanýǵa shaqyramyz. Eger problemalar týyndasa, aldymen emhananyń Pasıentti qoldaý qyzmetine habarlasyp, óz quqyqtaryńyzdy qorǵańyzdar», dep túsindirdi ÁMSQ elorda fılıalynyń halyqty aqparattandyrý bóliminiń bas sarapshysy Janargúl Úmbetova.
