Mysaly, Qostanaı qalasyndaǵy «О́rleý» biliktilikti arttyrý ortalyǵynyń ǵımaratynda ornalasqan №11 saılaý ýchaskesine 2622 adam tirkelgen. Saılaý ýchaskesi tańǵy saǵat 7:00-den beri jumys istep jatyr.
«Tańerteń Qazaqstan Respýblıkasynyń Memlekettik Gımnin tyńdap bolǵan soń, birden jumysymyzdy bastap kettik. Endi el úshin bul da bir úlken mereke ǵoı, sondyqtan daýys berýge birinshi bolyp kelgen 20 shaqty adamǵa shaǵyn tartý-taralǵymyzdy úlestirip berdik. Qazirge deıin myńnan astam turǵyn óz úmitkerlerine daýys berip úlgerdi. Saǵat 12:00-ge deıin biz qandaı da bir sebeptermen saılaý ýchaskesine kelip daýys bere almaıtyn 11 azamattan ótinish qabyldadyq. Olardyń ishinde 80-nen asqan zeınetker qarııalar, ózdiginen júrip-tura almaıtyn múmkindigi shekteýli jandar bar. Ol kisilerdiń árqaısymen jeke-jeke habarlasyp, sóılestik. Kóligimiz daıyn tur, qazir sol kisilerdiń úılerin aralaımyz», deıdi saılaý ýchaskesiniń tóraıymy Gúlbaný Sultanǵazına.
Saılaý ýchaskesine kelgen turǵyndarmen sóılesip kórdik. Áýlıekól óńirindegi Qazanbasy aýylynda dúnıege kelgen 73 jastaǵy Dáýrenbek Muhametjanuly 40 jyldan beri Qostanaıda turyp jatyr eken.
«Daýys berýden eshqashan bas tartyp kórgen emespin. Saılaý ýchaskesi úıge jaqyn, jubaıym ekeýmiz aıańdap jaıaý keldik. Men ózim senetin úmikerge daýys berdim. Meniń Prezıdentim, eń bastysy, irgemizdiń bútindigin, el ishiniń yntymaǵy men bútindigin ustap tura alatyn myqty tulǵa degen senimdemin. Jalpy, Prezıdent saılaýy sııaqty el múddesine kelip tireletin asa mańyzdy sharaǵa atsalysý árbir otanshyl azamattyń qasıetti paryzy. Bul demokratııanyń, halyq bıliginiń bir kórinisi. Qazir jaman turyp jatyrmyz ba? Bári de bar, osy yntymaq-berekemiz ornynda tursa, aspas asý, alynbas qamal bolmaıdy», deıdi zeınetker.
