Osylaısha daýys berýge kelgen saılaýshylar bilim oshaǵynda jaıylǵan dastarhanǵa otyryp dámi til úıirer palaýdan jep qaıtty. О́z kezeginde dastarhan basynda otyryp, salıqaly áńgimeler aıtyp, eldi birlikke, yntymaqqa shaqyrǵan qarııalar bul saılaýdyń el úshin qanshalyqty mańyzy bary jóninde keleli oı qozǵap, daýys berýge kelgen kisilerge aq batasyn berdi. Sonymen birge jurtqa dastarhan jaıyp, tegin as taratyp, halyqtyń kóńilin aýlaǵan, bul kúnniń shyn máninde merekeli kún ekenin sezdirýge tyrysyp, saýapty is jasaǵan bastamashyl topqa ózderiniń de ózge jurttyń da atynan aq peıil rızashylyqtaryn bildirdi.
«Álbette mundaı naýqan kezinde birlik pen tatýlyqtyń mańyzy zor ǵoı. Qazaqtyń dastarhany qashan da yntymaq pen berekege jaıylǵan. Adamdardy bir birimen tabystyrýǵa, ózara áńgime-dúken quryp, eldiń erteńi jaıly úlken oılar, keremet josparlar aıtatyn jer osy dastarhannyń basy. Sondyqtan búgin osyndaı sátti paıdalanyp, saılaýshylar úshin dastarhan jaıyp, dám usynyp jatyrmyz. Atam qazaq aıtady «Qyryqtyń biri qydyr, myńnyń biri ýálı». Sol aıtpaqshy, osy dastarhannan dám tatqan kisilerdiń biriniń sózi ýáli, aýzy dýaly bolyp, bergen batasy qabyl bolyp jatsa, nur ústine nur emes pe?! Jańbyrmenen jer kógerse, batamenen el kógeretinin umytpaǵan abzal. Osynaý saıası naýqannyń da kózdegen maqsaty erteńgi eldiń tizginin ustar azamatty saılap daýys berip, sonyń arqasynda eldiń kókeıinde júrgen arman-tilekteriniń oryndalýyna qol jetkizý ǵoı. Endeshe halyqtyń izgi tilegimen, ystyq yqylasymen Jaratýshynyń nazaryn elimizge aýdarsaq degen nıetimizdiń durys ekendigin aıtqym keledi. Memlekettiń negizigi mauraty da sol – birligimizdi tonnyń ishki baýyndaı berik etý, bekemdeý. Qazaqstanda qanshama dıaspora ókilderi ómir súredi. Olardyń barlyǵy da qazaq jerin óziniń Otany sanaıdy. Sondyqtan ózge ult ókilderi úshin de saılaýda tańdaý jasaýdyń máni erekshe. Jalpy saılaý degenimiz – mereke ǵoı. Al ózderińiz bilesizder, Shymkenttiń qaı merekesi palaýsyz ótken?!» dedi «Dýstlık» qaýymdastyǵynyń tóraǵasy Ikram Hashımjanov.
Aıta ketý kerek, qaladaǵy №64 saılaý ýchaskesinde tań sáriden beri daýys berýshiler qatary bir sıremeı belsendi qatysyp jatyr. Atalǵan saılaý ýchaskesinde 2 012 turǵyn tirkelgen eken. Júrip-turýy qıynǵa soqqan jandarǵa komıssııa músheleriniń ózderi baryp, jáshikke bıýlleten saldyryp ketýde. Saılaýda azamattardyń daýys berýine barlyq jaǵdaı qarastyrylǵan.
