Dástúrli festıvaldy «Qazaqstan jastary» qoǵamdyq qory jáne Qazaqstan stýdentteriniń alıansy uıymdastyrsa, Astana qalasynyń Jastar saıasaty máseleleri basqarmasy qoldaý kórsetken. «Jastar Jalyny-2022» festıvali jastardyń shyǵarmashylyq áleýetin shyńdaýǵa, daryndy jastardy anyqtap, belsendi stýdentterdi shabyttandyrýǵa súbeli úles qosyp keledi. Jastardyń rýhanı jáne mádenı áleýetin damytyp, stýdentterge tárbıe berý júıesin jetildirýmen qatar adamgershilik qundylyqtar men kóshbasshylyq qasıetterin arttyrý mindeti festıvaldyń negizgi maqsatyn aıqyndap berdi. Ásirese keıingi jyldary «Jastar Jalyny» festıvaline elorda jastary belsendi qatysyp, joǵary oqý ornynyń bedelin arttyrýǵa meılinshi úles qosýda desek asyra siltegenimiz emes. О́ıtkeni aýqymdy festıvalda 10 nomınasııa boıynsha topqa túsken jastar jalpy esepte kósh bastaýǵa baryn salatyny sózsiz. Bul joly festıvalǵa Astana qalasyndaǵy 14 ýnıversıtettiń stýdentteri qatysyp, medıa, zamanaýı bı, ulttyq bı, estrada, mýzykalyq aspaptar, aıtys, poezııa, sýret salý, teatr, qazaq quiz atalymynda myqtylardy anyqtady. Shyǵarmashylyqtyń shyńyna shyǵýǵa talpynysy joǵary jastardyń ónerin ár salanyń kil tájirıbeli ári tanymal mamandarynan jasaqtalǵan qazylar quramy baǵalady. Onyń ishinde mádenıet jáne óner qaıratkerleri, elge eńbegi sińgen ártister, kásibı horeograftar da bar. Jeńimpazdardy marapattaý rásiminde Astana qalasy ákiminiń orynbasary Eset Baıken memleketten jastardy qoldaý maqsatynda iske asyp jatqan jobalar jóninde az-kem aıtyp ótti.
– El úkimeti jastardy qoldaýǵa aıryqsha kóńil bólip otyr. Astana qalasynyń ákimdigi bıyl jastardy jumysqa ornalastyrý úshin 60-tan astam bos jumys orny jármeńkesin ótkizdi. Nátıjesinde, 11 myńnan astam jas turaqty jumysqa ornalasty. Sonymen qatar elordamyz jastardyń qalasyna aınaldy. Memleket tarapynan jas otbasylarǵa páter berý boıynsha júıeli jumystar 2019 jyldan bastaldy. Jas otbasylar aıaqqa turý úshin 5 jylǵa jaldamaly páter berýdemiz. Qala ákimdigi «Elorda jastary» baǵdarlamasy boıynsha jyl saıyn 200-den astam jastyń baspanaly bolýyna járdemdesedi. Sondaı-aq mektep bitirgennen keıin oqýǵa túse almaǵan túlekterge elorda ákimdigi arnaıy granttar bóledi. Bıyl 1 300-den astam naryqtaǵy suranysqa ıe mamandyqqa grant bólindi. Bul festıval da jyl saıyn dástúrli túrde uıymdastyrylyp keledi. Árıne, munda basty maqsat jeńis emes, elordanyń belsendi jastary bas qosyp, birin-biri jaqyn tanı tússe degen nıet te bar, – deıdi Astana qalasy ákiminiń orynbasary Eset Baıken.
Apta ishinde ár nomınasııa boıynsha jekeleı synda birinshi oryn enshilegender 100 myń teńgeden syıaqy alsa, ekinshi oryn oljalaǵandarǵa 70 myń teńge taǵaıyndaldy. Úzdik úshtikten kóringen stýdentterge 50 myń teńgeden tıdi. Al jalpykomandalyq esepte bıylǵy festıvaldyń bas júldesin L.N.Gýmılev atyndaǵy Eýrazııa ulttyq ýnıversıtetiniń stýdentteri qanjyǵaǵa baılady. Sol sekildi 2-oryndy Turan-Astana ýnıversıtetiniń jastary jeńip alsa, 3-oryn S.Seıfýllın atyndaǵy Qazaq agrotehnıkalyq ýnıversıtetiniń stýdentterine buıyryp, olar da qarjylaı syılyqtan qur qalmady.
