– «Táýelsizdik urpaqtary» granty jastardyń óz ıdeıasyn júzege asyrýǵa zor múmkindik beredi dep senemin. Bul is-shara bıyl Shymkent qalasynda alǵash ret uıymdastyrylyp otyr. Sonyń ózinde shaharda qanshama jas talanttar bar ekeni anyq baıqaldy. Josparǵa sáıkes 2023 jyly grant baǵyttary keńeıedi, sol arqyly budan da kóp jastardy yntalandyrýdy kózdep otyrmyz. Al bıik tuǵyrǵa kóterilgen jas jeńimpazdardyń jobalary qalamyzdyń mádenı-ekonomıkalyq damýyna úles qosady degen úmittemiz. Bul – jastardy qoldaýdyń bastamasy ǵana. Osyndaı granttyq kómekter arqyly aldaǵy ýaqytta bilimpaz, alǵyr jastardan budan da aýqymdy jobalar jasalady degen senimdemiz, – dedi basqarma basshysy Muratjan Shúkirhanuly.
Jastarǵa arnalǵan grantqa ótinim qabyldaý qyrkúıek aıynda bastalǵan. Baıqaýda baqtaryn synap kórý úshin 15 úmitker óz jobasyn joldaǵan. Sodan mine, búgin 3 baǵyt boıynsha 4 qatysýshy jeńimpaz atanyp, arman ıdeıasynan týǵan jobasyn júzege asyratyn qarajatqa qol jetkizip otyr. Bilim saıysynyń qorytyndysyna kelsek, «Medıa» jobasyn usynǵan Ernur Nurlanuly, «Mádenıet» baǵytynda ıdeıasyn qorǵaǵan Salıh Halıev, «Erikti» baǵytynda tyń jobasymen qazylar alqasynyń nazaryna ilikken qos úmitker Dıana Joldasbaeva men Tımýr Aýdanbaev joǵaryda atalǵan qomaqty júldemen marapattaldy. Jeńimpazdar arasynda eń jasy kishi qatysýshy Dıana Joldasbaeva óziniń usynǵan jobasy arqyly DSP, ıaǵnı sal aýrýyna shaldyqqan balalarǵa arnalǵan oıyn alańshalaryn ornatýdy maqsat tutady. Nebári on bes jastaǵy jetkinshek Dıana búgingi tańda Shymkent qalasyndaǵy №23 mekteptiń 10-synybynda oqıdy.
Jas eriktiniń aıtýynsha, eki jyldan beri óziniń bilim alyp júrgen mektebinde volonterler klýbynyń múshesi eken. «Eriktilerden quralǵan top qaladaǵy balalardy ońaltý ortalyǵyna barǵandy unatamyz. Bir baıqaǵanym – ol jerde naýqas balalarǵa arnalǵan oıyn alańy joq eken. Bul meniń júregime qatty batty. Balǵyndarǵa qandaı kómek kórsetsem bolady dep kóp oılandym. Granttyq jobaǵa úmitkerler qabyldap jatyr degendi estigende qatty qýandym. Jobam júldeli orynnan kórinip, jeńimpaz atandym. Endi maǵan bergen qomaqty qarjyǵa oıǵa alǵan josparymdy iske asyramyn. Ol úshin aldymen ońaltý ortalyǵyna oıyn qurylǵysyn qoıyp beremin. Sóıtip, naýqas balalardyń ózge balalar sekildi alańqaıda alańsyz oınap, kóńil kóterip, júzderiniń shattyqtan bal-bul janǵanyna óz tarapymnan úles qosqym keledi», deıdi Dıana.
ShYMKENT
