Qos tarap ekijaqty saýdany damytý, ınvestısııalyq ózara is-qımyl jáne energetıka salasyndaǵy yntymaqtastyq máselelerin, sondaı-aq Qazaqstan-Kanada Iskerlik keńesiniń qyzmetin egjeı-tegjeıli talqylady.
Premer-Mınıstr eki el arasynda keshendi saýda-ekonomıkalyq áriptestik qarqyndy damyp kele jatqanyn atap ótti. Máselen, ótken jyly ózara saýda kólemi 34%-dan astam ósip, shamamen $500 mln-dy qurady, al bıylǵy 9 aıda bul kórsetkish $730 mln-ǵa jetti. Sondaı-aq Qazaqstan ekonomıkasyna tikeleı kanadalyq ınvestısııalar kólemi de arta tústi, bul kórsetkish ótken jyly $385 mln-nan asty.
«Biz ınvestısııalyq yntymaqtastyqty odan ári nyǵaıtý jáne ózara saýda kólemin ulǵaıtý baǵytynda áleýettiń zor ekenin kórip otyrmyz. Qazaqstan ekonomıkanyń túrli sektorlaryndaǵy óz ónimderiniń 45 túrin jetkizý kólemin $255 mln-ǵa ulǵaıtýǵa daıyn», dep atap ótti Álıhan Smaıylov kezdesý barysynda.
Úkimet basshysynyń aıtýynsha, júk tranzıti jáne jańartylatyn energııa kózderin damytý salalarynda ózara tıimdi qarym-qatynastardy damytýdyń múmkindikteri zor.
Stefan Dıon qazaqstandyq tarapty Prezıdent saılaýynyń sátti ótýimen quttyqtap, respýblıkada júrgizilip jatqan áleýmettik-ekonomıkalyq reformalarǵa qoldaý bildirdi.
«Bul – Qazaqstan úshin de, álemdik qoǵamdastyq úshin de óte mańyzdy qadam. Osy baǵytta birlesip jumys isteýimiz kerek. Atap aıtqanda, «taza» sýtegine jáne basqa da turaqty otynǵa kóshý qyzyǵýshylyq týdyryp otyr», dedi Stefan Dıon.
