Japon jankeshtiligi súısintti

Seısenbi kúni tús aýa Ál-Haýr qalasyndaǵy «Ál-Baıt» stadıonynda Horvatııa men Meksıkanyń fýtbolshylary boı kórsetti. Birinshi kezeńde Zlatko Dalıchtiń shákirtteri qarsylastaryna qaraǵanda dopqa kóbirek ıelik etti. Biraq qaýipti sátter tym az boldy. Eń este qalǵany, Ivan Perıshıchtiń alystan baǵyttaǵan soqqysy jáne Nıkola Vlashıchtiń eki ret qaqpany nysanaǵa alýy. Eki retinde de Iаssın Býný qaýiptiń betin qaıtardy.Úzilisten keıin de alańdaǵy jaǵdaı esh ózgergen joq. Horvattardyń sapyndaǵy eń ataqty fýtbolshy Lýka Modrıch birneshe ret oıyn tizginin óz qolyna alýǵa talpynyp kórdi. Biraq odan esh nátıje shyqpady. Sońyna taman 37 jastaǵy ardager oıynshy da birte-birte boldyra bastady. Al basqalarynan esh qaıyr bolmady. Sóıtip, ish pystyrar bul báseke 0:0 esebimen aıaqtaldy.

Kóp keshikpeı Germanııa men Japo­nııanyń jigitteri jasyl alańǵa shyq­ty. Ádettegideı «nemis mashınasy» dop­ty birden «menshiktep» aldy. Eger sta­tıstıkaǵa júginsek, birinshi taımnyń qorytyndysy boıynsha dopqa ıelik etý jaǵynan olar 80 paıyzdyq kórsetkish­ke, ıaǵnı aıqyn basymdyqqa ıe boldy. Jáne de birinshi goldy nemister soqty. 33-mınýtta Ilkaı Gıýndogan 11 metr­lik núkteden esep ashty. Iá, negizinde alǵashqy dopty 8-mınýtta Japonııa quramasy soqqan edi. Alaıda oıynnan tys qalǵan Daızen Maedanyń bul golyn tóreshi esepke almady. Úzilisten keıin japondar oıyn shemasyn 4-2-3-1-den 3-4-3-ke ózgertip, ózderine tán jankeshtilikpen alǵa umtyldy. Iá, bas bapker Hadzıme Morııasý beker táýekelge barmaǵan eken. Kóp keshikpeı olardyń bul taktıkasy óz jemisin berdi. 75-mınýtta Rısý Doan jáne 81-mınýtta Takýma Asano qatarynan eki ret nysanany dál kózdep, Kúnshyǵys eli ókilderin alǵa shyǵardy. Esep – 1:2. Sol aralyqta Germanııa quramasy birneshe oıynshysyn almastyryp, ózderiniń tyń fýtbolshylaryn qatarǵa qosqanymen, olar da eshteńe óndire almady. Tablodaǵy esep básekeniń sońyna deıin saqtaldy. Bul – bıylǵy álemdik dop dodasyndaǵy ekinshi sensasııa!

«Ispanııa Qatarǵa osal quramda kel­di» dep daqpyrt aıtyp júrgenderdiń Doha­daǵy «Ál-Týmama» stadıonyndaǵy kezdesýden soń aýyzdaryna qum quıyldy. Kosta-Rıkaǵa qarsy báseke barysynda olardyń qanshalyqty qarýly ári azýly ekeni anyq baıqaldy. Básekeniń basynan aıaǵyna deıin Pırneı túbeginiń túlekteri oıyn tizginin óz qoldarynda ustady. Nátıjesi keremet boldy. 11-mınýtta Danı Olmo esep ashsa, 21-mınýtta Marko Asensıo ekinshi goldy soqty. 31-mınýtta Ferran Torres penaltıdi sátti oryndady. Ekinshi taımda ıspandyqtar taǵy tórt ret mergendik tanytty. Bul goldardyń avtorlary – Torres, Pablo Gavı, Karlos Soler jáne Alvaro Morata. Osylaısha, «Qyzyl fýrııa» Kosta-Rıkanyń qaqpasynda jaýapsyz jeti gol saldy – 7:0.

Bul kúnderi Belgııa quramasyn jer-kókke syıǵyzbaı maqtaıtyndar óte kóp. Barlyǵynyń aıtatyny «Qaqpashy Tıbo Kýrtýanyń reaksııasy keremet. Qorǵanysta Tobı Alderveıreld pen Iаn Vertongen turǵanda olardyń aıyp alańynda erkin kósile almaısyń. Al alańnyń ortasy men alǵy shepte Kevın De Breıne, Iýrı Tılemans, Aksel Vıtsel, Eden Azar, Romelý Lýkaký jáne Mıshı Batshýaıı erkin oıqastaıdy. Olardyń taý qoparatyndaı qarqynyna shydas berýdiń ózi qıyn» degenge kelip saıady. Shyny kerek, bul kezdesýde atalǵan komandadan ondaı qarqyn baıqamadyq. Osy matchta jaraqatynan áli de aıyǵa almaı júrgen Lýkakýdyń joqtyǵy anyq sezil­di. Denesi quryshtaı quıylǵandaı bo­ı­shań shabýylshynyń qıynnan qıystyra biletin ádeti bar edi.

Kanada quramasy da «ońaı alynbaıtyn qamal» ekenderin birden baıqatty. Olar ózderin qorǵanysta óte senimdi oınaıtyn ujym ekenderin kórsete bildi. Shabýyl shebi de osal emes-ti. Birinshi taımnyń ortasyna deıingi derekterge zer salsaq, kanadalyqtar qaqpaǵa segiz soqqy baǵyttasa, qarsylastarynyń bir ǵana soqqy jasaýǵa shama-sharqylary jetken eken. Ortada dopty óz ıeliginde ustaı alady. Úıeńki japyraqtar eliniń órenderi belgııalyqtardyń barlyq shabýylyna toıtarys berdi. Olar tek birinshi taımnyń sońynda Mıshı Batshýaııdy ǵana toqtala almady. «Fenerbahche­niń» shabýylshysy tepken dop qaqpa tory­nan tabyldy – 1:0. Al oǵan deıin Belgııa­nyń qaqpasyna eki penaltı belgilenýge ­tıis edi. Biraq tóreshi Djannı Sıkazve­niń eki retinde de VAR-ǵa júginýdi jón kórmedi. Bul onyń óreskel qateligi edi. Desek te zambııalyq qazy 11 metrlik núkteni bir márte meńzegenin aıta keteıik. Alaıda Kanadanyń fýtbolshylary ózderine berilgen tamasha múmkindikti ońdy paıdalana almady. Alfonso Devıstiń tepken dobyn Tıbo Kýrtýa keri qaıtardy. Ekinshi taımda kanadalyq­tar qarymta qaıtarýdyń barlyq amal-áreketin jasady. Olar qaqpany 22 ret nysanaǵa aldy. Biraq Kýrtýanyń min­siz oıynnyń arqasynda ǵana Belgııa­nyń qaqpasyna birde-bir dop kirgen joq. Keıbir sátterdegi qorǵaýshylar­dyń da saýatty oıynyn atap ótken abzal. Al maqtaýly «Qyzyl soıqandar» ne­bári toǵyz márte ǵana qaqpashy Mılan Borıan­dy mazalaǵan eken.

Keshe Shveısarııa men Kamerýn (saǵat 16:00-de), Ýrýgvaı men Ońtústik Koreıa (19:00), Portýgalııa men Gana (22:00) jáne Brazılııa men Serbııa (01:00) saıysqa tústi. Búgin toptyq týrnırdiń ekinshi týry bastalady. Bul kezdesýler Ýels pen Iran (16:00), Qatar men Senegal (19:00), Nıderland pen Ekvador (22:00) jáne Anglııa men AQSh (01:00) arasynda ótedi. Erteń Týnıs pen Aýstralııa (16:00), Polsha men Saýd Arabııasy (19:00), Fransııa men Danııa (22:00) jáne Argentına men Meksıka (01:00) fýtbolshylary sheberlik baıqasady. Al jeksenbi kúni Japonııa men Kosta-Rıka (16:00), Belgııa men Morokko (19:00), Horvatııa men Kanada (22:00) jáne Ispanııa men Germanııanyń (01:00) oıynyn tamashalaımyz.