Ertis-Baıan óńirinde qarasha aıynyń ekinshi onkúndiginen shyńyltyr aıaz turyp, aýa raıy qytymyr qysqa tán minez kórsetkeni balyq aýlaýǵa qumar álgi adamdy tym áýestendirip júrgen bolýy kerek. Ýsolka ózeniniń ústine qatqan juqa muzǵa shyǵyp, oıyq jasaı bergende sýyq sýǵa kúmp bergen. О́kinishke qaraı, alpysty alqymdap qalǵan arystaı azamatty qutqarý múmkin bolmady. Qutqarýshylar kelip úlgergenshe sýǵa tunshyǵyp ketti. Oblystyq tótenshe jaǵdaılar departamentiniń baspasóz qyzmeti habarlaǵandaı, álgi azamat jaǵadan nebári 5-6 metr ǵana uzaǵan eken.
– Qutqarýshylar habar túsken bette jetip, er adamdy sýdan alyp shyqqanda bári kesh bolǵan. Esten tanyp, kóp mólsherde sý jutyp qoıǵany sebepti júregi toqtaǵan syńaıly. Jedel járdem kóligi tez kelgenimen qutqarý múmkin bolmady, – delingen departament habarlamasynda.
Tótenshe jaǵdaı qyzmetkerleri balyq aýlaý kezindegi oryn alýy yqtımal baqytsyz jaǵdaılardyń basty sebebi – muzda qaýipsizdik talaptaryn saqtamaý, juqa muzdyń ústimen kólikpen jáne jaıaý ótý deıdi. Qarapaıym qaýipsizdik erejelerin eskermeý qaıǵyly oqıǵaǵa ákep soqtyrady.
Pavlodar oblysy tótenshe jaǵdaılar departamenti azamattyq qorǵanys basqarmasynyń aǵa ofıseri, kapıtan Qazbek Rymbekovtiń aıtýynsha, bıylǵy jyl basynan óńirde muz ústinde balyq aýlap júrip 3 adam sýǵa batyp ketken.
«Qys mezgili qarsańynda betine muz qatqan sý qoımasynyń betine shyǵý óte qaýipti. Alaıda kóptegen adamdar saqtyq sharalaryn elemeıdi. Sýdyń beti qatty qatpasa da kóptegen adamdar balyq aýlaýǵa shyǵyp jatady. Biz turaqty reıdter arqyly oqys oqıǵalardyń aldyn alýdy oılaımyz. Balyqshylardyń kópshiligi aýa raıyna qaramaı, kózsiz táýekelge bel býady. Al balalar sý betin syrǵanaq alańyna aınaldyrady. Jazataıym oqıǵalar oryn almas úshin áýeli qatty aıazdy kútken abzal», deıdi maman.
Balyq aýlaý úshin tushy sýda qalyńdyǵy keminde 10 santımetr jáne tuzdy sýda 15 santımetr muz adam úshin qaýipsiz dep sanalady eken. О́zen saǵalary men ózenderde muzdyń beriktigi álsiz bolady. Muz aǵyndy sýlarda, sondaı-aq sý ósimdikteri ósetin aýmaqtarda, aǵashtarǵa, butalar men qamystarǵa jaqyn jerlerde berik bolmaıdy. Eger aýa temperatýrasy 0 gradýstan joǵary bolsa, onda muzdyń beriktigi 25%-ǵa tómendeıdi. Mamandar muzdyń beriktigin kózben sholyp anyqtaýǵa bolady deıdi. Kók tústi muz berik, aq tústiniń beriktigi 2 ese az, sur, kúńgirt-aq nemese sarǵysh reńdi bolsa senimsiz degen sóz.
Pavlodar oblysy
