Aımaqtar • 26 Qarasha, 2022

Kardıologııa ınstıtýtynda alǵash ret júrektiń jasandy qarynshasy salyndy

57 ret kórsetildi

Almatyda alǵash ret Kardıologııa jáne ishki aýrýlar ǴZI-da 60 jastaǵy pasıentke júrektiń jasandy sol jaq qarynshasy (LVAD) ımplantasııalandy. Buǵan deıin júrekti mehanıkalyq qoldaý baǵdarlamasy Astana qalasyndaǵy Ulttyq kardıohırýrgııa ǵylymı ortalyǵynda engizilgen bolatyn, dep habarlaıdy Egemen.kz.

Búgingi tańda jer betinde 26 mıllıon adam júrek fýnksııasynyń jetkiliksizdiginen zardap shegedi, bul kesel pasıentterdiń 20%-da órshıdi. Jyl saıyn osy derttiń saldaryna baılanysty 1 mln adam aýrýhanaǵa jatqyzylady.

Júrek fýnksııasynyń jetkiliksizdigi – júrek bulshyqeti aǵzanyń qan men ottegige qajettiligin qanaǵattandyrý úshin jetkilikti mólsherde qan aıdaı almaıtyn sozylmaly progressıvti ahýal. Naýqasty entigý, keýdeniń qysylýy, aıaqtyń isinýi, búıregi mazalaıdy. Asqyna kele munyń sońy ajal qushtyrýy múmkin.

Sozylmaly júrek fýnksııasynyń jetkiliksizdigi qaterli isikten keıingi ólim-jitimge jeteleıtin aýrýdyń biri. Al LVAD ımplantasııasy aýyr SJJ dıagnozy qoıylǵan naýqastardy emdeýdiń jańa dáýiri desek te bolady.

«Implantasııalanatyn júrek sorǵysy júrekke qandy búkil aǵzamen aıdaýǵa kómektesedi jáne SJJ belgilerin jeńildetedi. Júrektiń qyzmeti de jaqsaryp, naýqasqa júrek transplantasııasyn kútýge múmkindik beredi. Keıbir naýqastar úshin bul ómirdi uzartýdyń jalǵyz múmkindigi», deıdi Kardıologııa jáne ishki aýrýlar ǴZI Basqarma tóraǵasy, professor Roza Qýanyshbekova.

Klınıka basshysynyń aıtýynsha, eki tútigi bar, bireýi qolqaǵa, ekinshisi júrektiń sol jaq qarynshasyna qosylǵan shaǵyn sorǵy sol jaq qarynshanyń qyzmetin atqarady. LVAD ómirdi uzartýǵa, burynǵy qalpyna oralýǵa múmkindik beredi. Jasandy júregi bar naýqastyń basqa adamdardan aıyrmashylyǵy – onyń tamyr soǵysy bolmaıdy.

«Bul operasııany klınıkamyzdyń kardıohırýrgtary Astanadaǵy Ulttyq kardıohırýrgııalyq ǵylymı ortalyqtaǵy áriptesterimen birge jasady. Biz júrekke joǵary tehnologııalyq operasııalardyń barlyq túrlerin jasaımyz. Keleshekte júrek patologııasyn emdeýdiń  jańa zamanaýı ádisterin ulǵaıtýdy jáne odan ári engizýdi josparlap otyrmyz», deıdi Roza Tohtanálıqyzy.

«Kómekshi mehanıkalyq qurylǵyny ımplantasııalaýǵa kórsetkishter – bul  shýnttaý, klapandardy protezdeý, kardıostımýlıatordy ımplantasııalaý nemese dári - dármekpen emdeý sııaqty basqa emdeý túrleri kómektese almaıtyn júrek aýrýynyń aýyr nemese termınaldyq satysyndaǵy pasıentter», dedi ǴZI kardıohırýrgııa bólimshesiniń meńgerýshisi Rústem Tóleýtaev.

Sońǵy jańalyqtar

Tarazda tórt jasar balany toq soqty

Qoǵam • Búgin, 22:51

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar