Qoǵam • 27 Qarasha, 2022

Ońaltý qyzmeti syn kótermeıdi

Tehnıkalyq quraldar men ońaltý qyzmetterin nashar jetkizýshilerdi Áleýmettik qyzmetter portalynan shyǵarý qajet. Mundaı mindetti jergilikti atqarýshy organdardyń aldyna Eńbek jáne halyqty áleýmettik qorǵaý mınıstri Tamara Dúısenova bıylǵy 10 aıdaǵy áleýmettik-eńbek salasyndaǵy jumys qorytyndylary jónindegi keńes barysynda qoıdy. Ákimdikter ony 2023 jylǵa deıin sheshýi kerek.

Dýman ANASh

Mınıstr múgedektigi bar adamdardyń ómir súrý sapasyn arttyrý máselelerine erekshe nazar aýdardy. Jyl basynan beri vedomstvo Eńbek jáne áleýmettik qorǵaý komıtetiniń aýmaqtyq departamentteri múgedektigi bar adamdardy áleýmettik qorǵaý salasynda jáne arnaýly áleýmettik qyzmetter kórsetý salasynda 967 tekserý júrgizdi, onyń qorytyndysy boıynsha 4 143 buzýshylyq anyqtaldy.

«Bul buzýshylyqtardyń kópshiligi beıimdelgen obektilerdi baqylaýdan keıingi tekserý nátıjesinde anyqtaldy. Jergilikti atqarýshy organdar bir nárseni málimdeıdi, al is júzinde basqa bolyp shyǵady. Sizder bul máselege naqty kózqaraspen qaraýlaryńyz kerek. Mysaly, eger mektepte erekshe qajettilikteri bar oqýshy bolmasa, qazir beıimdeýdiń qajeti joq. Sizder múgedektigi bar adamdar únemi baratyn obektilerdiń, ıaǵnı emhanalardyń, dárihanalardyń, HQO-lardyń jáne basqa da mekemelerdiń tolyq beıimdelýin qamtamasyz etýlerińiz kerek. Sondyqtan josparlaryńyzdy qaıta qarap, qajet bolǵan jaǵdaıda obektilerdi beıimdeýdi qamtamasyz etýlerińiz kerek», dedi T.Dúısenova.

Vedomstvo basshysy 2023 jyldan bastap eki qanatqaqty jobany iske asyrýdy usyndy. Birinshisi, árbir óńirde múgedektigi bar adamdardyń turýyna tikeleı jaqyn jerde arnaýly áleýmettik qyzmetter kórsetý úshin syıymdylyǵy az bir úı ashý. Ekinshiden, árbir óńirde múgedektigi bar balalarǵa arnalǵan qymbat turatyn ońaltýdyń tehnıkalyq quraldaryn (OTQ) berý jónindegi ortalyq «OTQ parki» qurylsyn. OTQ satyp alý «Qazaqstan halqyna» qorynyń qoldaýymen bolady dep jobalanýda.

Mınıstr sondaı-aq Áleýmettik qyzmetter portalynyń jumysyn jetildirý mindetin qoıdy.

«Men jumys saparymen Qazaqstannyń túrli óńirlerinde boldym. Barlyq jerde múgedektigi bar adamdar Áleýmettik qyzmetter portaly arqyly kórsetiletin ońaltý qyzmetteri jáne OTQ-nyń sapasyna qatysty máseleni kóteredi. Jergilikti atqarýshy organdar jyl sońyna deıin azamattardyń barlyq shaǵymdaryn taldap, bıyl sapasyz taýarlar men qyzmetterdi usynǵandardy kelesi jyly portaldan shyǵarý úshin bizge tıisti hattar jiberýi kerek. Ashyǵyn aıtqanda, nashar jetkizýshiler portalda bolmaýǵa tıis», dep atap ótti T.Dúısenova.