Eń nashar kórsetkish – baıyrǵy «Sberbank», qazirgi «Bereke Bank»-te. Byltyr bul qarjy ınstıtýty 102,8 mlrd teńge tabys tapsa, bıylǵy shyǵyn mólsheri tabysynan 287,3 mlrd teńge bolyp asyp túsken. Taǵy bir reseılik enshiles bank – «VTB Bank» shyǵyny – 37,2 mlrd teńge. «KZI Bank» (14,5 mlrd teńge) pen «Zaman-Bank» te (591,6 mln teńge) tabysqa shyǵa almaǵan bankter qatarynda. Damý dınamıkasy álsiregen bul qarjy ınstıtýttarynyń bári de byltyr tabysty bolǵan. О́tken jyly mınýsta bolǵan Al Hilal ıslam banki bıyl 2,3 mlrd teńgemen oń kórsetkishke ıe. Retteýshi menshik kapıtaly boıynsha da sol úsh bank úzdik – Halyk, Kaspi jáne BSK. «Bereke» men «Zamannyń» hali taǵy da qıyn. Jalpy, sektordaǵy retteýshi jıyntyq kapıtal kólemi 5,7 trln teńgege jetken (byltyr 5,2 trln teńge boldy). «Bereke Bank»-ten ózge ınstıtýttyń bári prýdensıaldy normatıvterdi buljytpaı oryndaǵan.
Ranking deregi boıynsha, 1 qazandaǵy jaǵdaıǵa sáıkes bankterdiń qaryz portfeli 22,3 trln teńge boldy. Bir jyldaǵy ósim – 23,3 paıyz.
«Úzdik ondyqta aılyq ósim boıynsha Bank RBK kósh bastaıdy (+9 paıyz, 865 mlrd teńge). Jyldyq dınamıkada bank portfeli birden-bir jarym ese ósken. Bul bank bızneske de, halyqqa da nesıe beredi. Ekinshi orynda – «Bank SentrKredıt» (+8,8 paıyz, 2 trln teńge). Bank portfeliniń jyldyq ósimi 61,9 paıyz bolǵan. BSK-daǵy mundaı erekshe qarqyndy ósim quramyna Eco Center Bank (burynǵy «Alfa-Bank») qosylǵannan keıin bolyp otyr. Úshtikti «Eýrazııalyq bank» túıindeıdi (+4,3 paıyz, 1,1 trln teńge). Bir jylda banktiń portfeli 51,3 paıyzǵa ulǵaıǵan», dep jazady Ranking.
Otandyq ekinshi deńgeıli bankterdegi salymdar da 4 paıyzǵa, 29,4 trln teńgege deıin ósken. Jyldyq ósim – 17,3 paıyz. Jeke tulǵalardyń salymy 14,68 trln teńge (sońǵy bir aıda +3,2 paıyz, sońǵy bir jylda +17 paıyz) bolsa, korporatıvtik salymdar kólemi – 14,73 trln teńge (sońǵy bir aıda +5 paıyz, sońǵy bir jylda +17,5 paıyz). Salymdardyń aılyq ósimi boıynsha da Bank RBK kóshbasshylyqty eshkimge bermeıdi. Bir jylda banktiń depozıti 55,4 paıyzǵa molaıǵan. Odan keıingi orynda salymshylardyń 1,7 trln teńgesin jınaǵan «Eýrazııalyq bank» tursa, úshtikke «Sıtıbank» ilingen – 1,2 trln teńge.
Qarjy naryǵyn retteý jáne damytý agenttiginiń tóraǵasy Mádına Ábilqasymovanyń aıtýynsha, nesıe naryǵynda jańa oıynshylardyń kelýine jol ashý úshin depozıt tartýǵa qatysty shekteýlerdi alyp tastaý josparlanyp otyr.
«Qarjy naryǵynyń qatysýshylarymen birge bank ashý úshin lısenzııalaý jáne ruqsat berý prosedýralaryn ońtaılandyrý boıynsha jumys júrgizdik. Jańa bankke lısenzııa alǵannan keıin bir jyl ishinde depozıt tartýdy shekteıtin norma bar. Bul norma osydan 20 jyl buryn, qazir qalyptasyp jatqan táýekelderdi basqarý júıesi bolmaǵan kezde qarastyrylǵan bolatyn. Sondyqtan bul talapty alyp tastaý kerek dep esepteımiz jáne zańnamaǵa tıisti ózgerister kelesi jyly engiziledi. Osy ózgeris bank sektorynda jańa oıynshylardyń paıda bolýyna múmkindik beredi», dedi M.Ábilqasymova.
Infografıkany jasaǵan Amangeldi Qııas, «EQ»
