1. Qazaqstan Respýblıkasynyń Prezıdenti Qasym-Jomart Toqaev Fransýz Respýblıkasynyń Prezıdenti Emmanıýel Makronnyń shaqyrýymen 2022 jylǵy 29-30 qarashada Fransııaǵa resmı sapar jasady.
2. Memleket basshylary 2008 jylǵy 11 maýsymdaǵy Qazaqstan Respýblıkasy men Fransýz Respýblıkasy arasyndaǵy Strategııalyq áriptestik týraly sharttyń qoldanysyn atap óte otyryp, eki el arasyndaǵy barlyq deńgeıdegi senimdi jáne turaqty dıalogqa qanaǵattanýshylyq bildirdi. Qazaqstan ̶ Fransııanyń Ortalyq Azııadaǵy basty ekonomıkalyq áriptesi, al Fransııa Qazaqstan ekonomıkasynyń jetekshi ınvestorlarynyń biri.
3. Qazaqstan men Fransııa arasyndaǵy dıplomatııalyq qarym-qatynastarǵa 30 jyl tolyp otyrǵan kezeńde prezıdentter eki el arasyndaǵy saıası jáne saýda-ekonomıkalyq yntymaqtastyqtyń joǵary serpinin quptady.
4. Fransýz Respýblıkasynyń Prezıdenti Qazaqstan Respýblıkasy Prezıdentiniń turaqtylyq pen ornyqty damýdyń aınymas sharty bolyp tabylatyn zań ústemdigin, negizgi bostandyqtardy jáne áleýmettik ádilettilikti nyǵaıtýǵa baǵyttalǵan tereń reformalar júrgizýin qoldaıtynyn rastady.
5. Taraptar jahandyq jáne óńirlik deńgeıde beıbitshilikti, qaýipsizdik pen turaqtylyqty nyǵaıtýǵa ózara járdemdesý nıetin qýattady. Olar halyqaralyq quqyq pen BUU Jarǵysynyń negizgi qaǵıdattaryna, ásirese memleketterdiń egemendigi men aýmaqtyq tutastyǵyna ózderiniń myzǵymas beıildigin atap ótti. Qazaqstan men Fransııa Ýkraına tóńiregindegi jaǵdaıǵa, onyń gýmanıtarlyq saldary men jahandyq ekonomıkaǵa áserine, eń osal elderdiń azyq-túlik qaýipsizdigine qatty alańdaýda.
6. Prezıdentter Qazaqstan Respýblıkasy men Eýropalyq Odaq arasyndaǵy Keńeıtilgen áriptestik pen yntymaqtastyq týraly kelisim aıasynda tyǵyz ózara is-qımyldy jalǵastyrýǵa daıyn ekendigi jóninde málimdedi. Osyǵan baılanysty olar 2022 jylǵy 27 qazanda Astanada ótken «Eýropalyq Odaq ̶ Ortalyq Azııa» birinshi sammıtiniń ótkizilýin quptady.
7. Olar Ortalyq Azııada iri kóliktik bastamalardyń, atap aıtqanda Transkaspıı halyqaralyq kólik baǵytynyń damýyn qanaǵattana atap ótti. Taraptar Eýropalyq Odaqtyń «Global Gateway» jobasynyń iske asýyna qoldaý bildirdi.
8. Prezıdentter Qazaqstan-Fransııa yntymaqtastyǵynyń joǵary serpinin basa aıtty jáne strategııalyq áriptestik rýhynda ony ártaraptandyrýdy jáne ózara múddeli barlyq, atap aıtqanda ekonomıka jáne ınvestısııa, bilim berý, densaýlyq saqtaý, ǵylym jáne mádenıet salalarynda tereńdetýdi jalǵastyrý týraly ýaǵdalastyqqa qol jetkizildi.
9. Ekonomıka salasynda prezıdentter saýda men ınvestısııany, ásiresi negizgi energetıkalyq sektorda odan ári damytýdyń joǵary áleýetin atap ótti. Qazaqstan Fransııaǵa ýran men shıki munaıdy negizgi jetkizýshilerdiń biri bolyp tabylady. Taraptar asa baǵaly shıkizat materıaldary, onyń ishinde jerde sırek kezdesetin materıaldar salasyndaǵy ózara yntymaqtastyqty damytý týraly ýaǵdalastyqqa qol jetkizdi. Sapar barysynda jańartylatyn energııa kózderi, «jasyl sýtegin» óndirý, beıbit atomdy paıdalaný, sý resýrstaryn basqarý, temir jol kóligi jáne agroónerkásip kesheni salalarynda birqatar ekijaqty qujattarǵa qol qoıyldy.
10. Klımattyq kún tártibiniń ózektiligi turǵysynda Qazaqstanda jınaqtaý múmkindigimen bar, respýblıkanyń kómirtegisiz ınnovasııalyq energııa kózderine kóshýine yqpal etetin qýaty 1,2 GVt jel elektr stansııasyn salý boıynsha aýqymdy jobanyń mańyzy atap kórsetildi. Bul joba klımattyń ózgerýine qarsy kúres salasyndaǵy ekijaqty yntymaqtastyǵymyzdyń nyǵaıý nyshany.
11. Prezıdentter bilim salasyndaǵy yntymaqtastyqtyń basymdylyǵyn atap ótti. Olar Astana men Almatyda eki fransýz mektebin ashýǵa jáne damytýǵa qoldaý bildirdi. Stýdentterdiń utqyrlyǵyn, atap aıtqanda «Abaı-Vern» baǵdarlamasy sheńberinde shákirtaqylar sanynyń kóbeıýine jáne «Bolashaq» baǵdarlamasy boıynsha fransýz joǵary oqý oryndary tizimin keńeıtý arqasynda arttyrýdy qoldady. Sondaı-aq Sorbonna-Qazaqstan ınstıtýtyn qaıta formattaýdy qoldaıtyndyqtaryn bildirdi jáne 2022 jylǵy 30 qarashada Parıjde 7-shi Qazaqstan-Fransııa joǵary bilim forýmynyń ótýin, sondaı-aq bilim berý salasyndaǵy birqatar qujattarǵa qol qoıýdy quptady.
12. Densaýlyq saqtaý salasynda eki eldiń jetekshi zertteý jáne medısınalyq ortalyqtary arasyndaǵy onkologııa, medısınalyq mekemelerdi basqarý jáne medısınalyq qyzmetter kórsetý salasyndaǵy áriptestikti jalǵastyrýdyń mańyzdylyǵyn rastady.
13. Prezıdentter mádenıet salasyndaǵy yntymaqtastyqty arttyrý nıetin bildirdi. Olar taıaý jyldary eki el arasynda mádenı is-sharalardy, onyń ishinde Parıjde Qazaqstan Respýblıkasynyń Ulttyq kórmesin ótkizýge baǵyttalǵan bastamalardy quptady.
14. Prezıdentter Sharm-el-Sheıhte ótken COP 27 Konferensııasynda klımattyń ózgerýine qarsy kúreste ózderiniń berik ustanymdaryn qýattady jáne 1,5° deńgeıindegi jahandyq jylý deńgeıin ustaý maqsatyn rastaýdy quptady.
15. Qazaqstan Respýblıkasynyń Prezıdenti Fransýz Respýblıkasynyń Prezıdentine 2024 jyly Parıjde ótetin HHHIII jazǵy Olımpıada oıyndaryna daıyndyqta tabys tiledi.
16. Qazaqstan Respýblıkasynyń Prezıdenti Fransýz Respýblıkasynyń Prezıdentin taıaý ýaqytta Qazaqstanǵa saparmen kelýge shaqyrdy.
