Izdestirý jumystary ótken jyldyń 26 tamyzynan bastap júrgizilgen.
Jarylys bolǵan aımaqta adam súıekteri pen kıim qaldyqtary tabylǵan. Súıekke jasalǵan molekýlıarlyq-genetıkalyq saraptama nátıjesi joǵalǵan azamatqa tolyq sáıkes keldi.
Búgin Baýyrjan Dáýitbaevty jerleý rásimi ótedi. Qoldanystaǵy zańnamaǵa sáıkes marqumnyń otbasyna jerleý shyǵyndary, atqaratyn laýazymy boıynsha bes jyldyq aqshalaı qarajat mólsherinde birjolǵy ótemaqy tólenedi.
Sondaı-aq turǵyn úı satyp alý úshin tólem qarastyrylǵan. Onyń mólsheri áskerı qyzmetshi qyzmet etken aımaqqa jáne otbasy músheleriniń sanyna baılanysty. Sonymen qatar marqumnyń balalaryn oqytýǵa, jumysqa ornalastyrýǵa, sondaı-aq basqa da máselelerdi sheshýge kómek kórsetiledi.
Eske sala ketsek, 2021 jyldyń 26 tamyzynda Jambyl oblysy, Baızaq aýdanynda ornalasqan áskerı bólim qoımasynda jarylys bolǵan edi. Oqıǵa saldarynan 17 adam qaza taýyp, 1 adam habar-osharsyz ketken edi.
