Qazaqstan Respýblıkasynyń Prezıdenti Qasym-Jomart Toqaev óz sózinde: «О́kinishke qaraı, sybaılas jemqorlyq áli de bizdiń qoǵamnyń aýyr derti bolyp otyr. Sybaılas jemqorlyq memleketterdiń kópshiliginde bar. Qazaqstan da odan syrt qalǵan joq. Onymen qalaı kúresip jatyr nemese qalaı áshkerelep otyr – ol basqa másele», dep atap ótti.
Qazirgi tańda sybaılas jemqorlyq aýqymdylyǵyna ǵana baılanysty erekshelenedi.
Sybaılas jemqorlyqpen kúres – qoǵam talaby. Minsiz qoǵam – jemqorlyqsyz qoǵam, salaýatty ómir – paraqorlarsyz ómir, myqty memleket – jemqorlarsyz memleket. Elimiz elý eldiń qataryna ený úshin aıaq basqanda aınalamyzdy ashkóz alaıaqtardan alastap, qoǵamdy tazartý – azamattyq mindetimiz.
Qazaqstan Prezıdenti sybaılas jemqorlyqqa qarsy kúres elimizdiń strategııalyq damýynyń negizgi basymdyqtarynyń biri ekenin aıtty. Bul baǵytta birqatar mańyzdy mindet atqarylǵan, atap aıtqanda, Qazaqstan halyqaralyq GREKO uıymyna múshe boldy, qaramaǵyndaǵy qyzmetkerdiń sybaılas jemqorlyqqa qatysy anyqtalǵan jaǵdaıda onyń basshysynyń qyzmetinen bosatylýy zańmen bekitildi, sybaılas jemqorlyq táýekelderin zańnamamen saraptaý jumystary kúsheıtildi.
«Sybaılas jemqorlyqtyń sebebi men sharttaryn joımaı onymen kúresý, bul – jel dıirmenmen alysý. Halyq áldebir sheneýniktiń nemese basshynyń jaı jaýapkershilikke tartylǵanyn kórip qana qoımaı, ol jumys istegen memlekettik mekemede endi mundaı jaǵdaıdyń qaıtalanbaıtynyn dáleldeıtin túbegeıli ózgeristerdiń oryn alǵanyna kýá bolýy kerek. Ázirge men mundaı keshendi jáne túbegeıli jumysty kórip otyrǵan joqpyn. Sheneýnikter sheńber jasap, birinen keıin biri aýysyp jatyr. Al júıeli problemalar sheshilmegen kúıi tur», dedi Qasym-Jomart Toqaev sybaılas jemqorlyqqa qarsy kúres máseleleri jóninde keńeste sóılegen sózinde.
Sonymen qatar sybaılas jemqorlyqpen pármendi kúresý úshin halyqtyń quqyqtyq saýatsyzdyǵyn joıatyn, quqyqty túsindirý jumysynyń deńgeıi men sapasyn arttyrý kerektiginiń mańyzy zor. Halyq óz quqyǵyn, ózderine qarsy qandaı da bir quqyqqa qaıshy is-áreket jasalǵan jaǵdaıda qandaı is-qımyl qoldaný kerektiginiń naqty joldaryn tolyq bilýleri qajet. Konstıtýsııalyq tártipti qorǵaý, sybaılas jemqorlyqpen kúres aıasynda tıimdi, biryńǵaı jalpy memlekettik saıasat júrgizý, memleket pen azamattardyń ómir súrýiniń barlyq salalarynda sybaılas jemqorlyq pen onyń kórinisteri deńgeıin tómendetý, qoǵamnyń memleketke jáne onyń ınstıtýttaryna senimin nyǵaıtý búgingi kúndegi basty maqsat bolyp otyr.
Osy maqsattaǵy jumystardy júıeli júrgizýge taǵy bir serpin retinde «Qazaqstan Respýblıkasynda qylmysqa jáne sybaılas jemqorlyqqa qarsy kúresti kúsheıtý jáne quqyq qorǵaý qyzmetin odan ári jetildirý jónindegi qosymsha sharalar týraly» Qazaqstan Respýblıkasy Prezıdentiniń Jarlyǵy qoldanysqa engizilgen. Bul Jarlyq elimizdegi quqyq qorǵaý organdary qyzmetterin jetildirýge baǵyttala otyryp, sybaılas jemqorlyqqa qarsy árekettermen olardyń paıda bolýynyń aldyn-alýda júıeli, ári turaqty sharalar atqarýdy qamtamasyz etedi. Sybaılas jemqorlyq tek quqyq buzýshylyq emes. Bul memlekettiń tıimdiligine degen senimdi tómendetedi jáne ulttyq qaýipsizdikke tikeleı qater tóndiredi. Sondyqtan memleket pen qoǵam sybaılas jemqorlyqqa qarsy birigip, áreket etýi kerek.
