Jóndeýshi tapshy

Qazir kómirli shaharda problema týyndap turǵan kópqabatty 70-ten astam úı bar. Jóndeý brı­­ga­dalary ár turǵyn úı úshin kúni-túni jantalasyp, ishine muz qatqan qubyrlardy jibitýge túrli ádis qoldanýda. Tótenshe jaǵdaı qyz­metiniń arnaıy jylytqysh qondyrǵylary jertóleler men podezder ishine úlken qubyrlar en­gizip, ǵımarattardy jylytýǵa tyrysyp júr. Alaıda kesheli-beri qysa túsken aıaz qalpyna keltirý jumystaryna aıtarlyqtaı kedergi keltirýde.

Máshhúr Júsip kóshesi, №46 úı turǵyny Larısa Pýzıkova 9 táýlikten beri jylýsyz otyrǵanyn aıtady. Al Sátbaev kóshesi, №8 úıde tura­tyn Lıýdmıla Kazanseva esimdi eki­bastuzdyq ana úı ıeleriniń amaldary ábden quryǵanyn, páter ishindegi temperatýra nólden tó­men bolyp turǵanyn jetkizdi. «Tur­mys­tyq tehnıkalarymyz qatyp qalǵan, elektr jelisine qosýǵa múlde jaramaı­dy. Elektr jaryǵy qaıta-qaıta sónedi», dedi ol.

Ekibastuzda apat bastalmas bu­ryn jylý parametrleri túsip ketken bas­panalar da bar bolyp shyqty. Máselen, Energetıkter kóshesi, 83 mekenjaıyndaǵy kópqabatty úı 25 qarashadan beri qıyn jaǵdaıda tur. Shaharda keshendi apat oryn alǵan kúni úı ıeleri qubyrlardaǵy sýdy aǵyzyp jibergen. Jóndeý brıgadalaryna berilgen tizimde bul úı joq. «Shuǵyl jelige» habarlassa, ondaǵylar jóndeý brıgadalarynyń jetispeıtinin aıtqan.

Apatty qalpyna keltirý jónin­degi jedel shtabtyń esebine súıensek, barlyǵy talapqa saı qosylyp jatyr. Álgindeı úıler tipti atalmaıdy. Máselen, jedel shtabtyń jetekshisi, Premer-Mınıstrdiń birinshi orynbasary Roman Sklıar keshe joǵaryda atalǵan 70-ten astam úıdiń jylytý toraptarynda jóndeý jumystary aıaqtalǵanyn habarlady. Qazir páterlerdiń ishindegi qubyrlar men regıstrlerdi qosý júrip jatyr. Sonymen qatar mamandar sý jáne káriz júıelerin qalpyna kel­tirýde. Jóndeý-qalpyna keltirý jumystaryna jalpy sany 851 adam jumyldyrylǵan.

– Apat saldarynan jylýdan ajyrap qalǵan barlyq úıdiń jertó­le­sine deıin jylý kirgizildi, jylý aınalymy qalpyna kele bastady. Jóndeý brıgadalary jeksenbi kúni keshki 20.00-ge deıin úılerdiń ishindegi 850 jylý batareıalaryn aıyrbastady. Stansada ysyrap bolyp jatqan sý kólemi shamamen 360 tonna, kásiporyn buǵan qosymsha taǵy 350 tonnadaı joǵaltyp otyr. О́kinishke qaraı, keıbir úılerde PIK-ter tıisti sharalardy ýaqtyly atqarmaı, sonyń saldarynan júıe­ler aıazda qatyp qalǵan. Qazir Sátbaev kóshesi, 8 úı, Máshhúr Júsip kóshesi, 52 úı, Áýezov kóshesindegi №47, 46, 46A, Sheshembekov kóshesi, 19A úılerinde qıyndyq týyndaýda. Shtab jetekshisi, Úkimet bas­shy­sy­nyń birinshi orynbasary Roman Sklıardyń tapsyrmasymen ár úıge belgili bir kásiporyndar bekitildi. Álgi kásiporyndardyń basshylary qalpyna keltirý jumys­ta­ry­nyń basy-qasynda ózderi júr. Bul jaǵdaı barlyq zaqymdaný tolyq qalpyna keltirilgenshe saqta­lady. Úılerdi jylýǵa qosý jaqyn ýa­qyt­ta aıaqtalady dep otyrmyz, – dedi Pavlodar oblysy ákiminiń min­de­tin ýaqytsha atqarýshy Oleg Krýk burnaǵy kúni ótken brıfıngte.

Shtab ókilderi apatty joıý shara­laryna belsendi atsalysyp jatqan «SAEM» kompanııasyna, «Shyǵys» kenishi, MAES-1, MAES-2 stansalaryna, «Bozshakól» KBK-ǵa, «Bogatyr Kómir» jáne KEGOK kásiporyndarynyń basshylyǵyna, sondaı-aq óz jumysyn adal atqaryp júrgen PIK-terdiń ókilderine alǵys­taryn bildirdi. Aıazda turǵyn­dar men jóndeý brıgadalaryna ystyq shaı men as-aýqat tasyp júr­gen eriktilerdiń eńbegi de maq­taý­ǵa laıyq.

Qala basshysy Aıan Beısekınniń aıtýynsha, apattan zardap shekken turǵyndardyń barlyq shy­ǵy­nyn óteýdi «Ortalyq Azııa Elek­tro­­­energetıkalyq Korpo­ra­sııa­sy» AQ óz mindetine alyp otyr. Jóndeý jumystarynda paıdalanylyp jatqan qubyrlar men radıatorlar negizinen atalǵan AQ-nyń jáne demeý­shilerdiń esebinen satyp alynypty. Barlyq kópqabatty turǵyn úılerdiń jylý toraptary qalpyna kelgen soń jóndeý brıgadalary sýyq sý qubyrlaryn jibitýge jáne júıeleri qatyp jatqan 70 jeke úıdiń qubyrlaryn retteýge attanady. Buǵan qosa OJP-52 nysanyna jáne ózge de magıstraldarǵa qosylǵan birneshe áleýmettik ny­sannyń júıelerin durystaý kózdelip otyr.

«Ekibastuz jylý-energo» JShS-nyń basshylyǵy keshe túske qaraı stansa shtatty rejimde jumys istep turǵanyn, jylý tasymal­da­ǵyshtardaǵy sýdyń temperatýrasy 87, aınalymdaǵy sý 59 gradýs ekenin málimdedi. Burnaǵy kúni túnde Ekibastuzǵa 4 myń jylý radıatory men 20 myń metr bolat qubyrlar tıelgen 15 júk kóligi jetti. Taǵy 2 myń radıator keshe ákelindi. Bul materıaldar magıstraldaǵy, oramishilik jáne úıishilik júıelerdi aýystyrýǵa paıdalanylady. Budan basqa dáne­kerleý jumystaryn júrgizý úshin qosymsha elektrodtar, tegistegishter, jylýoqshaýlaǵysh, rýberoıd, ysyrmalar satyp alyn­ǵan.

Mamandar Ekibastuzdaǵy jaǵ­daı­dy tolyq retke keltirý áli biraz ýaqytty talap etetinin aıtyp otyr.

Pavlodar oblysy,

Ekibastuz qalasy