Saıasat • 06 Jeltoqsan, 2022

Qazaqstan tájirıbesi joǵary baǵalandy

Memleket basshysynyń tapsyrmasymen elimizdegi quzyrly organdar sheteldik áriptestermen baıandy baılanys ornatyp, 2019-2021 jyldar aralyǵynda «Jýsan» arnaıy gýmanıtarlyq operasııasy sátti júzege asqany málim. Sol ýaqyt aralyǵynda 700-ge jýyq qazaqstandyq Otanyna oralǵan bolatyn. Qazaqstannyń bul tájirıbesin sheteldik sarapshylar joǵary baǵalap otyr.

Oralhan AHMADIIа

Sheteldik meımandar Astanada ótken «Qaqtyǵys aımaqtarynan qaıtarylǵan tulǵalardy ońaltý jáne reıntegrasııalaý: Ortalyq Azııa elderiniń tájirıbesi» atty halyqaralyq konferensııada óz oılaryn ortaǵa salyp, tájirıbe almasýǵa yntaly ekenderin jetkizdi.

Konferensııada sóz alǵan Aqparat jáne qoǵamdyq damý mınıstri Darhan Qydyráli BUU, Eýropalyq odaq, halyqaralyq uıym ókilderi, dıplomattar, AQNIET qory, Aqparat jáne qoǵamdyq damý mınıstrligi birlesip uıymdastyrǵan alqaly jıynnyń elimiz úshin mańyzy asa zor ekenin aıtty.

– Qazaqstan álemde qaqtyǵys aımaqtary – Sırııa sergeldeńinen, Sham shyrǵalańynan, ottyń ortasynan otandastaryn alyp shyqqan az memleketterdiń biri. Konferensııada álemniń birneshe elinen jáne kórshiles Ortalyq Azııa memleketterinen kelgen ǵalymdar men sarapshylar Qazaqstannyń bul baǵyttaǵy tájirıbesin joǵary baǵalady. Memleket basshysy Qasym-Jomart Toqaevtyń tapsyrmasymen azamattarymyzdy qaıtarý sheshimniń durys bolǵandyǵyna qazir bárimiz kýá bolyp otyrmyz. Búginde elge qaıtarylǵan otandastarymyz óz ortalaryna qosylyp, qoǵamymyzǵa qaıta sińisip, qalypty, beıbit ómir súrip jatyr. Olarǵa barlyq qoldaý kórsetilip otyr, – dedi Darhan Qydyráli.

Aıta ketý kerek, bıyl qarasha aıynda Human Rights Watch uıymy Sırııadan elderine qaıtarylǵan balalar týraly arnaıy esep jarııalady. Uıym Qazaqstan óz azamattaryn elge qaıtaryp, olardyń qoǵamǵa beıimdelýine júıeli túrde jaǵdaı jasap kele jatqan az eldiń biri ekenin atap ótti.

Jıynǵa qatysqan BUU Esirtki jáne qylmys boıynsha Ortalyq Azııadaǵy óńirlik ókili Ashıta Mıttal Qazaqstannyń qaqtyǵys aımaqtarynan qaıtarylǵan adamdardy ońaltý boıynsha atqaryp jatqan jumysyn joǵary baǵalady.

– Qazaqstan ekstremızmge qarsy saýatty, keshendi strategııa qurǵan. Onda ártúrli sharalar qarastyrylǵan. Máselen, terrorızm órship turǵan aýmaqqa túskenderdi elge qaıtarý sharasy týraly atap ótýge bolady. Dálirek aıtsaq, «Jýsan» operasııasy barysynda balalar men áıelder Otanyna oralyp, búginde olarǵa jan-jaqty kómek kórsetilip jatyr, – dedi Ashıta Mıttal.

Amerıkalyq sarapshy, professor Stıven Ýeın de «Jýsan» operasııasy – qaqtyǵys aımaqtarynan otandastaryn qaıtarýǵa tyrysqan ózge memleketterge úlgi eterlik birden-bir joba ekenin erekshe atap ótti. Ol Qazaqstannyń Otanyna oralǵan áıelder men balalarǵa degen áleýmettik qoldaýyn joǵary baǵalady.