Úkimet • 06 Jeltoqsan, 2022

Memlekettiń ekonomıkaǵa qatysý úlesi 14%-ǵa deıin tómendeıdi

60 ret kórsetildi

QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda Jekeshelendirýdiń 2021-2025 jyldarǵa arnalǵan keshendi josparyn oryndaý barysy qaraldy, dep habarlaıdy Egemen.kz Úkimettiń baspasóz qyzmetine silteme jasap.

Premer-Mınıstrdiń orynbasary – qarjy mınıstri Erulan Jamaýbaev Keshendi josparǵa 675 memlekettik menshik jáne kvazımemlekettik sektor nysany kiretinin baıandady.

Onyń ishinde 7 respýblıkalyq jáne 250 kommýnaldyq menshik obektisi, 262 ulttyq holdıngter men kompanııalar obektisi, sondaı-aq shamamen 150 ÁKK obektisi bar.

Búginde 141,7 mlrd teńge turatyn 253 obekt básekelestik ortaǵa berildi, 60 obekt qaıta uıymdastyrýǵa jáne jabylýǵa baǵyttalǵan, 146 obekt – saýda-sattyqta jáne taǵy 216 obekt – satý aldyndaǵy daıyndyqta. Satý, qaıta uıymdastyrý jáne jabý boıynsha Keshendi jospardyń oryndalýy 46%-dy quraıdy.

Ulttyq ekonomıka mınıstri Álibek Qýantyrovtyń aıtýynsha, jekeshelendirý tizbesin keńeıtý úshin aktıvterdi irikteý krıterııleri bekitildi. Osy krıterııler negizinde Keshendi josparǵa 170-ten astam nysan qosylyp, ózektendirildi. Sonymen qatar jekeshelendirý kezinde memlekettiń múddelerin saqtaý úshin strategııalyq uıymdardaǵy baqylaý úlesterin saqtaý kózdelgen.

Sonymen qatar, búginde kommýnaldyq kásiporyndardy jekeshelendirý tásili qaıta qaraldy. Máselen, jospardan halyqtyń tirshiligin qamtamasyz etý úshin mańyzdy 200-den astam áleýmettik mańyzy bar obekti (sýmen, elektrmen jáne jylýmen jabdyqtaý) alynyp tastaldy.

Budan keıin «Samuryq-Qazyna» UÁQ» AQ basqarma tóraǵasy Almasadam Sátqalıev baıandama jasady.

Premer-Mınıstr jekeshelendirý máseleleri memlekettik organdardyń birinshi basshylarynynyń erekshe baqylaýynda bolýy tıis ekenin atap ótti.

«Keshendi jospardy iske asyrý 2025 jylǵa qaraı memlekettiń ekonomıkadaǵy úlesin 14%-ǵa deıin qysqartýǵa múmkindik beredi. Satýǵa qoıylǵan árbir obekt boıynsha Jol kartasy ázirlendi. Olar memlekettik múlik tiziliminiń veb-portalynda ornalastyrylǵan. Aktıvterdi básekeles naryqqa josparly túrde shyǵarýdy qamtamasyz etý qajet», dedi Álıhan Smaıylov. 

Sonymen qatar, Úkimet basshynyń aıtýynsha, obektilerdiń satý aldyndaǵy daıyndyq sapasyna da kóbirek kóńil bólý kerek. Keshendi jospardy tolyqqandy iske asyrý úshin jekeshelendirý prosesiniń ashyqtyǵyn arttyrý qajet.

«Memlekettik organdar, óńir ákimdikteri, kvazımemlekettik sektor uıymdary jospardy naqty oryndaýy qajet. Jyl qorytyndysy boıynsha jumystaryńyzǵa tıisti baǵa beriletin bolady», dedi Álıhan Smaıylov. 

Qorytyndylaı kele, Premer-Mınıstr «Samuryq-Qazyna» qoryna «QazMunaıGaz» ulttyq kompanııasynyń IPO-syn sapaly ótkizýdi qamtamasyz etýdi, al Qarjy mınıstrligine Keshendi jospar obektileriniń satylýyna baqylaýdy kúsheıtýdi tapsyrdy.

Sońǵy jańalyqtar

Prezıdent qolónershiler kórmesin aralady

Prezıdent • Búgin, 21:01

Uqsas jańalyqtar