Muń men qýanyshtyń aınasy

Oblystyq teatrdyń ujymy premeralar aptasyn ótkizdi. Alǵashqy kúni akterler N.Ptýshkınanyń «Kúzgi mahab­bat» satıralyq komedııasyn, odan soń jas dramatýrg Mereı Qosynnyń «Men joq jerdegi «Meniń ómirim» atty ekspe­rı­menttik dramasyn jáne sońǵysy A.Volo­dınniń «Kezdesý men qoshtasý» psı­ho­logııalyq dramasyn usynyp, kórer­menderdiń zor qoshemetine ıe boldy.

Janrlary úsh túrli, qoǵamdaǵy túrli máselelerdi qaýzaıtyn spektaklder anshlagpen ótkenin baıqadyq.

Kerekýlik qoıýshy rejısserler men akter­lerdiń ónerin ónertaný doktory, T.Júrgenov atyndaǵy Qazaq ult­tyq óner akademııasynyń professory Baqyt Nur­peıis jáne óner magıstri, atalǵan aka­demııanyń aǵa oqytýshysy Aıjan Ahmet arnaıy kelip kórip, kásibı turǵydan baǵa berdi.

– Árıne, birden úsh shyǵarmanyń premerasyn ótkizý ońaı sharýa emes. Mundaı qadamǵa akterlik quramy myqty teatr ujymy ǵana táýekel etip barady. Bir mezette qatarynan úsh birdeı jańa qoıylymnyń tusaýyn kesýi elimizdiń mádenı ómirindegi aıtýly oqıǵa desek, artyq aıtqandyq emes. Jalpy, Arman Temirbekuly osy teatrǵa dırektor bolyp kelgennen bastap mádenıet ordasynyń jańa tynysy ashylyp, tyń izdenisterimen kózge túsip júr. Aıta­lyq, onyń tikeleı basshylyǵymen teatr sońǵy jyldary respýblıkalyq festıvalderine belsene qatysyp, júldeli oryndarǵa qol jetkizdi. Ol jas rejısserlerge qoldaý kórsetip, «premeralar aptalyǵyn» ótkizýdi quptaǵandyqtan da búkil ujym bul is-sharaǵa úlken jaýapkershilikpen qarap, jumyla kiriskeni baıqaldy. Ár qoıylymnan keıin kásibı teatr synshylarynyń pikirin tyńdap, oı bólisti. Shyǵarmashyl ujymnyń sheberlik shyńdaýǵa degen umtylystary men búgingi teatr úderisinen qalyspaýǵa degen taýdaı talaptary olardyń tyń izdenisterin pash etedi, – deıdi B.Nurpeıis.

Teatr synshysy janr ereksheligine tereń úńilý, sóz astaryn ashý men sóılem salmaǵyn baıyptaý, akterlerge keıipker daralyǵyn uǵyndyrý máselesi úsh rejısserde de kemshin túsip jatqanyn tiz­beledi. Aıtalyq, N.Ptýshkınanyń «Kúzgi mahabbatynda» Sofıa Ivanovna rólin oınaǵan Qarlyǵash Jeksembaeva­nyń beıne túzýdegi oılylyǵy, keıipker­diń jan dúnıesindegi arpalystardy daýys maqamyn qubylta otyryp jetkizýi onyń akterlik tehnıkasynyń myqtylyǵyn kórsetedi. «Men joq jerdegi «Meniń ómirim» spektaklinde jas akterler óz­de­riniń plastıkalyq ıkemdilikteri­men kóz­ge tústi. Al «Kezdesý men qoshtasý» qo­ıylymyndaǵy buryn talaı rólderde oınap, ábden ysylǵan sahna maıtal­mandary B.Shánim, G.Omarova, D.Ádil, G.Qaıyrbekova, Q.Musanova óz keıip­ker­leriniń jan dúnıesine tereń boılap, kórer­mender sanasyna salıqaly oı sala bildi.

Buǵan qosa jas býyn akterlerdiń oıynynda keıipker janynyń qyr-syryn, oı tolǵamdaryn, ishki sezimderi men tebirenis­terin psıhologııalyq dáldikpen jetkizý olqy túsip jatqanyn, aldaǵy ýaqytta jas akterler rólmen jumys isteýge jaýap­kershilikpen qarap, kásibı turǵyda shyń­dala tússe kóp utar edi degen oıyn qosty.

Al Aıjan Ahmet Pavlodar oblystyq teatry búgingi kún suranysyna jaýap bere alatyndaı shyǵarmashylyq izdenis ústinde ekenin atap ótti. Premeralar aptalyǵy – óner ujymynyń jańalyq pen jańashyldyqqa umtylysy.

– Úsh qoıylym, úsh rejısser, teatr­dyń barsha akterlik quramy jumyl­ǵan. Bul teatrdyń búgingi múmkindigin kórsetip otyr. Aptalyq aıasynda kór­gen qoıylymdarymyz óziniń rejıs­serlik sheshimderimen, sahnalyq bezendi­rilýimen erekshelendi. Rejısser E.Qaý­lanov sahnalaǵan «Kúzgi mahab­bat» qoıylymynda kórermenniń sezim qylyn tebirenterlik spektakl jasaýǵa umtylysy basymyraq. Jańa jyl qar­sa­ńyndaǵy oqıǵany arqaý etetin bul shyǵarma ár kez óziniń ózektiligin jo­ǵaltpaq emes. Al M.Qosynnyń «Men joq jerdegi «Meniń ómirim» dramasy adam janynyń keńistikte ózin izdeýine ne­gizdelgen. Rejısser J.Sadyqov dástúrli sheshimderden qasha otyryp, jańa for­ma tabýǵa talpynys jasaǵany qýantady.

Ártúrli janrdaǵy spektaklder bú­gingi kún talabynan týyndap otyrǵa­ny belgili. Aldaǵy teatr festıvalderin­de aımaýytovtyqtardyń jarq etip kóri­ný­ge múmkindikterin kórip otyrmyz, – deıdi ­teatr synshysy.

О́nertanýshylar dál qazirgi kezde kerekýlik teatr qorjynynda álemdik klas­­sıka men zamanaýı pesalar jetkilikti ekenin baıqapty. Elimizdiń ótken tarıhynan syr shertetin tarıhı dúnıeler, ulttyq klassıkalyq pesalar da búgingi zaman talabyna saı qoıylyp otyrsa, akterler­diń sheberligin shyńdaýǵa úlken mektep bolary sózsiz. Osydan on shaqty jyl bu­ryn opera, operetta men mýzykalyq spektaklder bul teatr repertýarynyń sek­sen paıyzyn quraǵan eken. Zamanmen úndes­ken ulttyq klassıka jańasha ınterpreta­sııa taýyp jatsa, bul tek ujymnyń emes, jalpy qazaq teatr óneriniń jetistigi bolmaq.

PAVLODAR