Qazir Astana qalasynda koronavırýs ınfeksııasy boıynsha epıdemııalogııalyq jaǵdaıdy turaqty dep aıtýǵa kelmeıdi. Sebebi 24 qazannan búginge deıin vırýs juqtyrǵandardyń sany táýligine 61-den 69-ǵa deıin jetti. Vırýstyń taralý jıiligi jeltoqsan aıynda 4,6 paıyzǵa artyp, syrqattanǵandardyń sany 70-ten 322 jaǵdaıǵa deıin ósken. Sońǵy aptada, ıaǵnı 29 qarashadan 7 jeltoqsanǵa deıin koronavırýs ınfeksııasynyń 432 jaǵdaıy tirkelgen. Bul koronavırýs juqtyrǵandardyń sany aldyńǵy aptamen salystyrǵanda 1,8 ese óskenin kórsetedi. Al ótken táýlikte koronavırýs ınfeksııasyn juqtyrǵany alǵashqy zerthanada rastalǵan 67 jaǵdaı tirkelipti. Soǵan qaramastan, Astana qalasy epıdemıologııalyq jaǵdaı boıynsha jasyl aımaqta qala bermek. Sondyqtan elordanyń sanıtarlyq-epıdemıologııalyq baqylaý departamenti basshysynyń orynbasary Janna Pralıeva koronavırýstyń aldyn alý úshin turǵyndardy sanıtarlyq talaptardy saqtap, vaksına alýǵa shaqyrýda.
«Omıkron» shtamynan vırýstyń «Serber» degen túri shyqty. Koronavırýs ınfeksııasynyń «Serber» shtamynan vırýs juqtyrǵandardyń sany artýy múmkin. Mamandardyń aıtýynsha, «Serber» tez taraıdy. Vırýstyń mýtasııaǵa ushyraǵan jańa túriniń sımptomy jiti respıratorlyq vırýstyq ınfeksııaǵa, ıaǵnı tumaýǵa uqsas. Dene qyzýy kóterilip, býyn aýyrýy múmkin. Sondaı-aq álsizdik baıqalady. Soǵan qaramastan, mamandar Serberden adam ómirine aıtarlyqtaı qaýip joq ekenin aıtady. Keıingi 48 aptadaǵy epıdemıologııalyq jaǵdaı boıynsha qalada jiti respıratorlyq vırýstyq ınfeksııanyń 6 648 jaǵdaıy tirkelgen. Koronavırýs ınfeksııasy men tumaýdyń órshýine baılanysty turǵyndarǵa vaksına alyp, turǵylyqty mekenjaı boıynsha emhanalarǵa júginýge keńes beremin. Sebebi vırýstyń aldyn alýdyń eń tıimdi ádisi – vaksınalaý. Koronavırýs ınfeksııasynyń toqtap, mýtasııalanbaýyna qoǵamdyq ımmýnıtet qarsy tura alady», deıdi J.Pralıeva.
Astana qalasy qoǵamdyq densaýlyq saqtaý basqarmasy basshysynyń orynbasary Berik Qaıkenov te vaksına alǵan turǵyndar syrqattanǵan kúnniń ózinde vırýstyń belgileri jeńil ótetinin aıtady.
– Qazir Astana qalasynda 6 ınfeksııalyq stasıonar jabdyqtalǵan. Onda 184 tósektik oryn bar. Qazir ınfeksııalyq stasıonarlarda 105 adam em alyp jatyr. Olardyń ishinde 85 adamnyń koronavırýs ınfeksııasyn juqtyrǵany belgili bolsa, 20-sy pnevmonııamen túsken. Reanımasııada 7 naýqas em alýda. Vaksınalaý men revaksınalaýdy ýaqtyly alǵan adam ózin vırýstan 90 paıyzǵa deıin qorǵaıdy. Naq qazir elordada 12 myń vaksına bar (QazVac, Sinopharm, Pfizer). О́zderińiz biletindeı, osyǵan deıin pandemııa saldary syrqatty emdeýden buryn aldyn alý sharalary tıimdirek ekenin kórsetti. Al vırýsty aldyn alýdyń birden-bir joly – vaksınalaý, – deıdi ol.
Mamandar vırýs juqtyrǵandardyń deregin taldap, syrqattanǵandardyń basym kópshiligi vaksına saldyrmaǵanyn anyqtaǵan. Sondyqtan epıdemıolog dárigerler qala turǵyndaryn vaksına alyp, sanıtarlyq erejeni saqtaýǵa shaqyrýda.
