Jýyqta bul ýnıversıtetke Álkeı Marǵulannyń esimi berilgenin atap ótken abzal. Sharaǵa Ǵylym jáne joǵary bilim vıse-mınıstri Qýanysh Erǵalıev, Á.Marǵulannyń urpaǵy Danel Álkeıqyzy qatysty.
–Búgin Pavlodar pedagogıkalyq ýnıversıtetiniń ujymy úshin tarıhı sát. Jaqynda bilim ordasyna akademık, kórnekti tarıhshy ǵalym Álkeı Marǵulannyń esimi berilgen bolsa, búgin oqý ordasynyń tórinde bıýsti ashyldy. Bul oqý ornynyń ujymy úshin joǵary mártebe jáne úlken jaýapkershilik, – dep atap ótti Qýanysh Asylhanuly.
Qazaqstannyń eńbek sińirgen ǵylym qaıratkeri, akademık Á.Bekturovtyń qurmetine arnalǵan aýdıtorııanyń ashylýy da eleýli oqıǵa sanalady. Tirisinde dúnıe júzin moıyndatqan ǵalym Baıanaýyl aýdanynyń týmasy. Tehnıka ǵylymdarynyń doktory, professor, Qazaqstan ǵylym akademııasynyń akademıgi boldy. Keńes ókimeti tusynda AQSh-ta óte aýqymdy, dúnıe júziniń ǵalymdaryn qamtyǵan ǵylymı ensıklopedııa jaryq kórdi. Sol ensıklopedııaǵa keńes elinen bar-joǵy 10 ǵalym ense, sonyń biri – jerlesimiz Ábiken Bekturov.
«Ábiken Bekturuly meniń ákem ispetti bolyp ketken kisi edi. Kezinde kózin kórip, aqyl-keńesin tyńdadyq. Meniń bala kezimde aǵasy Hamze Bekturovpen jaqyn aralastyq. Sol kezde Ábiken aǵasynyń úıine jıi keletin. Al búgin ýnıversıtet qabyrǵasynda arnaıy aýdıtorııa ashylýynyń kýási boldyq. Bul bizdiń áýletimiz úshin úlken mártebe. Oqý ornynyń ujymyna alǵys bildiremin», dedi akademıktiń týysy Saılaý Tájibaev.
Atap óterligi, munda «О́negeli tulǵalar» atty kitaptar serııasynyń kezekti jınaǵynyń tusaýkeseri ótkizildi. Birinshi serııada 11 tulǵaǵa arnalǵan kitaptar jaryq kórgen bolsa, osy jolǵysy 6 ǵalymǵa arnaldy.
Pavlodar oblysy
