«Ádil jáne tıimdi ekonomıkalyq saıasat júrgizilýi kerek. Elimizde ádil báseke ornap, bıznes adal jumys istese, ádiletti naryqtyq ekonomıka qurylady. Eń aldymen, otandyq kásipkerlerdiń senimin arttyrý óte mańyzdy. Ekonomıkany monopolııadan aryltý úshin mekemearalyq komıssııa quryldy. Bul komıssııa qajetti jumysty tıimdi júrgizip jatyr», dedi Prezıdent.
Sondaı-aq qazir jeke menshikke zańsyz ótip ketken aktıvterdi qaıtarýǵa basa mán berilip otyr. Biraq, Memleket basshysynyń aıtýynsha, keıbir máseleler nazardan tys qalyp barady.
«Ekonomıkaǵa memlekettiń qatysýyn azaıtý, monopolısterdi ózine janama qatysy bar naryqtyń qyzmetine aralastyrmaý – óte mańyzdy jumys. Ákimshilik kedergilerdi azaıtyp, naryqqa baǵa belgileý arqyly qysym jasaýdy toqtatý kerek», dedi Qasym-Jomart Toqaev.
Prezıdent Bas prokýratýranyń janynan arnaıy qurylǵan komıssııanyń jumysyna qatysty da pikir bildirdi.
«Komıssııa zańsyz jolmen alynǵan jáne syrtqa shyǵarylǵan aktıvterdi memleketke qaıtarýmen shuǵyldanady. Men jaqynda arnaıy Jarlyqqa qol qoıdym. Osylaısha, bul baǵyttaǵy jumystyń aıasy naqtylandy. Osy sharýamen aınalysatyn qyzmetter uıymdastyrý jáne kadrlyq jaǵynan kúsheıtiledi. Jumystyń tıimdiligi artady dep senemin», dedi Memleket basshysy.
