Taraptar ekijaqty saýda-ekonomıkalyq qatynastardyń ózekti jaı-kúıi men damý perspektıvalaryn, atap aıtqanda energııa resýrstary men shıkizat salasyndaǵy yntymaqtastyqty keńeıtýdi, kólik-logıstıkalyq áleýetti arttyrý jónindegi jobalardy birlesip iske asyrýdy, Qazaqstanǵa nemis ınvestısııalaryn tartýdy talqylady.
«Dıplomatııalyq qatynastardyń ornaǵanyna 30 jyl tolǵan jyly biz ekijaqty qarym-qatynastarymyzdyń strategııalyq sıpatyn qanaǵattanýshylyqpen atap ótemiz», dedi M.Tileýberdi.
Sonymen qatar M.Tileýberdi áriptesine Prezıdent Qasym Jomart-Toqaev jarııalaǵan «Ádil Qazaqstandy» qurý baǵyty aıasynda elimizdegi aýqymdy saıası jáne áleýmettik-ekonomıkalyq reformalar týraly aıtyp berdi.
Nemis tarapy Qazaqstannyń mańyzdy geosaıası rólin atap ótip, bizdiń memleket Germanııanyń Ortalyq Azııadaǵy mańyzdy saýda seriktesi ekenin atap ótti. R.Habektiń aıtýynsha, 2021 jyly Germanııanyń Ortalyq Azııa elderimen saýda kóleminiń 85% Qazaqstanǵa keldi. Osy jyldyń 9 aıynda ekijaqty taýar aınalymy 6,8 mlrd eýrony qurady, bul ótken jyldyń sáıkes kezeńindegi kórsetkishten 83%-ǵa joǵary.
Sol kúni mınıstr M.Tileýberdi men qazaqstandyq delegasııa músheleri nemis isker toptarynyń ókilderimen, atap aıtqanda «HMS Bergbau AG», «Hermith» jáne «Knauf» iri nemis kompanııalarynyń basshylarymen kezdesýler ótkizdi. Nemis bıznesmendermen yntymaqtastyqty keńeıtý perspektıvalary talqylandy jáne Qazaqstanda lıtıı barlaý jáne óndirý, tıtan buıymdaryn jáne jańa germandyq tehnologııalardy paıdalana otyryp qurylys materıaldaryn óndirý salasyndaǵy ınvestısııalyq jobalardy is júzinde iske asyrý múmkindikteri qaraldy.
Búgingi tańda Qazaqstanda nemis kapıtaly bar 650-den astam jumys istep turǵan kompanııa tirkelgen, shamamen 4,8 mlrd eýro somasyna 50-ge jýyq áleýetti ekijaqty ınvestısııalyq joba bar.
