Qazan aıynan beri Astana men Almaty qalalarynyń mektepterinde bastaýysh synyp oqýshylaryna arnalǵan aspazdyq sheberlik baıqaýlary ótip jatyr. Keleshek urpaqtyń densaýlyǵyn saqtaýǵa baǵyttalǵan bastamalardyń qaı-qaısysy da qoldaý men nazar aýdarýdy qajet etetindikten, Almaty qalasyndaǵy №52 jalpy bilim beretin mektepke bas aspaz ótkizgen sheberlik sabaǵyna keldik.
Bul joly «Salaýatty tamaqtaný mektebi» bilim berý baǵdarlamasy aıasynda ótken dáriske 3-synyp oqýshylary ata-analarymen birge qatysty. Aıtqandaı, is-sharaǵa 2030 jylǵa deıin dúnıe júzindegi 50 mln-ǵa deıin balany durys tamaqtanýǵa daǵdylandyrýǵa bastamashy bolyp otyrǵan «Nestle Qazaqstan» men Almaty qalalyq bilim berýdegi jańa tehnologııalar ǵylymı-ádistemelik ortalyǵy uıytqy boldy.
Bilim berýdegi jańa tehnologııalar qalalyq ǵylymı-ádistemelik ortalyǵynyń bólim basshysy Tatıana Ejova balalardy durys tamaqtanýǵa ádettendirý týraly aıta kele: «Baǵdarlama barynsha jeńil bolǵandyqtan, balalar paıdaly taǵamdar, dárýmender, dıeta qurý negizderin bilýge yqylaspen umtylady», deıdi. Al «Nestle» bilim berý baǵdarlamalary bóliminiń basshysy, pedagogıka ǵylymdarynyń kandıdaty Aleksandra Makeeva «Salaýatty tamaqtaný mektebi» bilim berý baǵdarlamasy óziniń 10 jyldyǵyna qadam basyp kele jatqanyna toqtala kele: «Osy aýqymdy jobanyń aıasynda taǵy bir qosymsha bastamany qolǵa aldyq. Balalar sabaqtan tys ýaqytta mektepte nemese úıde bas aspazdar júrgizgen onlaın sheberlik-dáristeri arqyly densaýlyqqa paıdaly taǵamdar ázirlep, konkýrs platformasyna ornalastyrady. Birinshiden, bul taǵamdardyń daıyndalýy óte qarapaıym, ekinshiden óte paıdaly, úshinshiden dámdi ári kóńildi. Keıin balalarǵa ómir boıy qajet bolatyn oıyn túrindegi baıqaý jeltoqsan aıynda aıaqtalady. Árıne, jeńimpazdar marapattalady. Eń qyzyǵy, baǵdarlamaǵa tartylǵan oqýshylar úıde áke-sheshelerin durys tamaqtana bilýge úıretedi eken», deıdi.
ALMATY
