Jarystyń ashylý saltanatyna Astana qalasy ákiminiń orynbasary Erlan Bekmurzaev, qalalyq Dene shynyqtyrý jáne sport basqarmasynyń basshysy Samat Jylqybaev, jáne qazaqstandyq ziltemirshi Ilıa Ilın qatysyp, sportshylarǵa sáttilik tiledi.
«Batyrs Battle – bul salaýatty ómir saltyn nasıhattaıtyn kópsaıysty týrnır. Erekshe joba alǵash ret 2007 jyly júzege asqan edi. Búgingi sharanyń negizgi maqsaty — Qajymuqan, Balýan Sholaqtardyń jattyǵý úrdisin jalǵap, halyq arasynda keńinen nasıhattaý. Orasan kúshtiń ıesi Qajymuqan babamyz — kúrestiń birneshe túrinen álem chempıony atanǵan tuńǵysh qazaq alyby. Teńdessiz ónerimen jer sharyn aralaǵany belgili. Qajymuqannyń izbasarlary kúsh synasatyn dodada eń myqtylar jeńis tuǵyrynan kórinýine tilektespin!», dedi qala ákiminiń orynbasary Erlan Bekmurzaev.
Uıymdastyrýshylardyń aıtýynsha jarys balalar men jastardy qazaq eliniń tarıhymen tanystyrsa, aǵa býynǵa óz bilimderi men tájirıbelerimen bólisýge múmkindik beretin joba. Munda árkim óziniń kúshi men qabiletin kórsete alady. Týrnırdiń maqsaty jeńý nemese jeńilý emes. Ol – arenanyń tar keńistiginde, myńdaǵan adamnyń aldynda óz kúshin kórsetý.
Bes raýndtan turatyn saıysqa 10 balýan qatysty. Qatysýshylar sahna aldynda turǵan qaptardy kóterip qana qoımaı saıystyń erejesi boıynsha bórene, tas kóterip, metaldan jasalǵan shybyqty maıystyryp, belbeý kúresine de qatysty. Ár raýndtan keıin tóreshiler alqasy ár qatysýshyǵa belgili bir upaı sanyn berip, myqtylaryn anyqtap otyrdy.
Týrnırdiń qorytyndysy boıynsha jeńimpazdar men júldegerler medaldarmen, dıplomdarmen marapattaldy.
Aıta keteıik, is-shara Astana qalasy ákimdiginiń qoldaýymen Qazaqstandyq sportshylar odaǵynyń uıymdastyrýymen ótti.
