Dástúrli shara jyl saıyn jahandyq órkenıet pen elimizdiń damý baǵytyna saı úsh tildi – qazaq, orys jáne aǵylshyn tilderin jetik meńgergen, jan-jaqty bilimdi, óz salasynyń kásibı mamany tanylǵan memlekettik qyzmetshiler arasynda uıymdastyrylyp keledi. Baıqaýdyń maqsaty - qazaq, orys, aǵylshyn tilderin jetik meńgergen memlekettik qyzmetshilerdiń pýlyn qurý, olardy qoldaý, nasıhattaý, mártebesin kóterý.
Sharaǵa Astana qalasynda ornalasqan memlekettik organdardan 3 memlekettik qyzmetshilerden turatyn barlyǵy 14 toptan quralǵan 42 úmitker qatysty.
Baıqaýda Ǵylym jáne joǵary bilim mınıstrligi Til saıasaty komıteti tóraǵasynyń orynbasary Abzalbek Ǵabıt Muhamedjanuly quttyqtaý sózben ashyp, qatysýshylarǵa sáttilik tiledi.
Baıqaý shartyna saı qatysýshylar «Eltanym», «Sóztanym», «Oıtanym» kezeńderi boıynsha baq synady. Olardyń úsh tildi meńgerý deńgeıi men tildik normany saqtaýy, orfografııalyq jáne orfoepııalyq saýattylyqtary baǵalandy. Jeńimpazdy Fılologııa ǵylymdarynyń kandıdaty, Qazaqstan jazýshylar odaǵynyń múshesi, ilespe aýdarmashy Álpeıisova Kamal Ábilqasymqyzy tóraǵalyq etken arnaıy qurylǵan qazylar alqasy anyqtady.
Qazylar alqasy músheleriniń ortaq sheshimi boıynsha Qazaqstan Respýblıkasy Ulttyq qaýipsizdik komıtetiniń komandasy Bas júlde ıegeri atandy.
I oryndy Qazaqstan Respýblıkasynyń Qarjy monıtorıngi agenttiginiń komandasy;
II oryndy Qazaqstan Respýblıkasy Aqparat jáne qoǵamdyq damý mınıstrligi, Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrligi komandalary;
III oryndy Qazaqstan Respýblıkasynyń Joǵary aýdıtorlyq palatasy, Qazaqstan Respýblıkasy Ádilet mınıstrligi jáne Qazaqstan Respýblıkasy Memlekettik kúzet qyzmeti komandalary ıelendi.
Barlyq qatysýshylar Ǵylym jáne joǵary bilim mınıstrligi Til saıasaty komıteti tóraǵasynyń alǵys hatymen, «Til sheberi-2022» dıplomymen jáne aqshalaı syılyqtarmen marapattaldy.
