– Abaı oblysynda kásipkerlikti damytýǵa jáne qoldaýǵa kóp kóńil bólinedi. Memlekettik baǵdarlamalardy iske asyrý aıasynda jáne bıznesti memlekettik qoldaý sharalarynyń nátıjesinde kásipkerlerdiń tómengi paıyzben nesıe alýǵa múmkindikteri bar. О́ńirlik fılıaldardyń, qorlardyń jumysy mıkro, shaǵyn jáne orta kásipkerlikti qoldaýǵa baǵyttalatynyna senimdimin. Naqty óńirlik baǵdarlamalardy iske asyrý úshin qarajat tartý jumysy jalǵasady. Bul jańa jumys oryndaryn qurýǵa jáne halyqtyń ómir súrý sapasyn arttyrýǵa múmkindik beredi, – dedi Ulttyq ekonomıka mınıstri Əlibek Qýantyrov.
Jańa fılıalda Abaı oblysynyń aýyl sharýashylyǵy óndirýshileri qajetti tehnıkany lızıngke ala alady. Fılıal qyzmeti Besqaraǵaı, Borodýlıha jáne Abaı aýdandarynyń sharýalary úshin kólik shyǵyndaryn edáýir qysqartyp, bıznes-prosesterdi jedeldetýge múmkindik beredi.
– Buǵan deıin Shyǵys Qazaqstan oblysynyń fermerleri tehnıkany lızıngke alatyn eń belsendi paıdalanýshylardyń biri boldy. 11 aıda oblysta 698 tehnıka lızıngke berildi. Osy málimetke saı Abaı oblysynyń aýyl sharýashylyǵyn damytýda úlken áleýeti bary baıqalady. Taǵy bir aıta keterligi, Abaı oblysynyń turǵyndaryna bizdiń tarapymyzdan kóptegen múmkindik jasalady. Aldaǵy ýaqytta bul týraly qosymsha habarlaıtyn bolamyz, – dedi «QazAgroQarjy» AQ basqarma tóraǵasy Aıdar Prashev.
Abaı oblysynda kem degende 650 fermerlik sharýashylyq tehnıkany uzaq merzimge jalǵa ala alady. Bul – aýylsharýashylyq bıznesin qurý jáne damytý úshin úlken qoldaý. Túptep kelgende, munyń ózi dúken sórelerindegi ónimderdiń molaıa túsýine oń yqpalyn tıgizetini daýsyz.
Sonymen qatar osy saltanatty is-sharaǵa qatysyp, sóz sóılegen «Agrarlyq nesıe korporasııasy» AQ basqarma tóraǵasy Almat Áshirbekov pen «Qazaqstan fermerleri assosıasııasy» oblystyq fılıalynyń tóraǵasy Serik Baıǵalıev jańadan qurylǵan Abaı oblysynda «QazAgroQarjy» aksıonerlik qoǵamy fılıalynyń ashylýy mańyzdy qadam ekenin aıtty. Búginde sharýa qojalyǵymen aınalysyp, kásibin dóńgeletip júrgen azamattar kóbeıý ústinde. Sondyqtan, olarǵa qolaıly jaǵdaı jasaý qajet. Álbette, onyń nátıjesi de bolýy kerek.
Búginde arnaıy ishki baǵdarlamalar men mobıldi qosymshalardy jetildirý maqsatynda jumys júrgizilip jatyr. Olar qoldanýshylarǵa meılinshe túsinikti ári jeńil bolatyndaı qurastyrylyp, usynylǵan qyzmetterdi adamdar úılerinde otyryp ala alady.
Osy oraıda «QazAgroQarjy» AQ elimizdiń agroónerkásibi lızıngi naryǵynda atalǵan salanyń zamanaýı jáne joǵary tehnologııaly tehnıkaǵa qajettiligin qamtamasyz etip otyrǵan kóshbasshy bolyp sanalady.
– Búgingi tańda kompanııamyz qazaqstandyq lızıng naryǵynyń shamamen 80 paıyzyn qamtyp otyr. Fılıaldarymyz elimizdiń barlyq óńirinde qyzmet kórsetip keledi. Olardy jaqyn arada bıyl qurylǵan Ulytaý jáne Jetisý oblystarynda da ashamyz, – dedi «QazAgroQarjy» AQ basqarma tóraǵasy Aıdar Prashev.
Baqytgúl QAZEZ
